ئەمڕۆ هەینی لە بناری کۆدۆی سەر بە ناحیەی حاجی ئۆمەران، مینێکی جۆری ڤاڵمارا بە گەنجێکدا تەقییەوە کە سەرقاڵی کشتوکاڵکردن بووە و بەهۆیەوە گیانیلەدەستداوە.
بەپێی زانیارییەکانی پەیامنێرمان، گەنجەکە دانیشتووی حاجی ئۆمەران بووە و تەمەنی 28 ساڵ بووە و سەرقاڵی کاری کشتوکاڵ بووە.
لە ماوەی سێ مانگدا ئەوە دووەمین هاوڵاتییە لە حاجی ئۆمەران بەهۆی مینەوە گیان لەدەستدەدات.
بەپێی ئامارێکی بەشی ڕاگەیاندنی دەزگای کاروباری مینی هەولێر، لە سنووری پارێزگای هەولێر زیاتر لە 360 ناوچەی گومانلێکراو بە بوونی مین هەن، کە بەشێکی زۆریان کەوتوونەتە ناوچەی باڵەکایەتی و ژمارەیان دەگاتە سەرووی 160 ناوچەی گومانلێکراو.
هەر بەپێی ئامارەکە، له هەرێمی کوردستان ساڵانە 50 تا 60 کەس بەر مین دەکەون.
ئەو کێڵگە مینڕێژکراوانەی باڵەکایەتی جگە لەوەی بوونەتە مەترسی لەسەر ژیانی هاوڵاتییانی سنوورەکە، بوونەتە مەترسی لەسەر ژیانی گەشیاران و شاخەوانان و جوتیارانیش.
