وەزارەتی کارەبای حکومەتی هەرێم داوا لە دوو کۆمپانیای ئیتاڵی و ئێرانی دەکات، بە زوترین کار کارەکانی وێستگەی هایدرۆپاوەری دێرەلوک تەواوبکەن، تا ببەسترێت بە کارەبای نیشتمانییەوە.
بەپێی زانیارییەکان، لە سەرەتای ساڵی داهاتوو وێستگەی هایدرۆپاوەری دێرەلوک بەگەڕ دەخرێت و بە تۆڕی نیشتمانیی کارەبا دەبەسترێتەوە.
ئەمڕۆ شاندی کۆمپانیای ELC ئیتاڵی کە سەرپەرشتیی جێبەجێکردنی پڕۆژەکە دەکات، سەردانی وەزارەتی کارەبای کرد و بە ئامادەبوونی نوێنەرانی کۆمپانیای فارابیی ئێرانی جێبەجێکاری پرۆژەکە، هەنگاوەکانی جێبەجێکردنی پرۆژەکە و چارەسەری گرفتە تەکنیکییەکانی خستوەتەڕوو.
هاوکات کەمال محەمەد، وەزیری کارەبای هەرێم داوای لە نوێنەرانی هەردوو کۆمپانیایەکە کردووە بەزووترین کات پرۆژەکە تەواو بکرێت و لەکاتی دیاریکراودا وزەی کارەبای بەرهەمهێنراو بە تۆڕی نیشتمانیی کارەبا ببەسترێتەوە.
وێستگەی هایدرۆپاوەری دێرەلوک بە دوو تۆرباینەوە توانایی بەرهەمهێنانی 37 مێگاوات کارەبای هەیە و وەک وەزارەتی کارەبا دەڵێت، پڕۆژەکە یەکێکە لە خاوێنترین و ژینگەپارێزترین وێستگەکانی بەرهەمهێنانی کارەبای هەرێمی کوردستان.
