ئەمریکا سزای بەسەر حەوت بازرگانی قەتەریدا سەپاند، بەهۆی ئەوەی پشتیوانیی تۆڕێکی دارایی حیزبوڵای لوبنانیان دەكرد لە نیمچە دوورگەی عەرەب.
وەزارەتی خەزێنەی ئەمریکا لە ڕاگەیەندراوێكدا ئاماژەی بەوەكردووە، ئەو حەوت كەسە كە سەرجەمیان هاوڵاتیی قەتەرین، لە ڕووی دارایی و ماددییەوە پشتیوانییان لە حیزبوڵا کردووە، كە وەک تیرۆریستانی جیهانی ناسراون.
ڕوونیشیكردووەتەوە، بەپێی سزاکان، سەرجەم سەرمایەی ئەو کەسانەی سزاکان دەیانگرێتەوە لە ئەمریکا سڕدەکرێن، هەروەها هیچ ئەمریکییەکیش ناتوانێت مامەڵەی کاریان لەگەڵدا بکات.
ئاندریا گاکی، بەرپرس لە وەزارەتی خەزێنەی ئەمریکا، حیزبوڵای بە سووکایەتیكردن بە سیستمی دارایی نێودەوڵەتی تۆمەتبارکردووە لە ڕێی تۆڕێکی جیهانی.
