سوپای توركیا و گروپە چەكدارەكان هێرشێكیان كردە سەر گوندێكی “عەین عیسا” لە پارێزگای حەسەكە، هەسەدە بەرپەرچی هێرشەكەی داوەتەوە، بەهۆیەوە هاوڵاتییەك گیانیلەدەستدا و چواری دیكەش برینداربوون.
بەپێی هەواڵی میدیاكانی ڕۆژئاوای كوردستان، بەرەبەیانی ئەمڕۆ چوارشەممە سوپای توركیا و گروپە چەكدارە سورییە هاوپەیمانەكانی، هێرشیانكردووەتە سەر گوندی دبس لە “عەین عیسا”ی سەر بە پارێزگای حەسەكە، مەبەستیان بووە گوندەكە و ڕێگەی نێودەوڵەتیی پارێزگاكە داگیربكەن، بەڵام لەلایەن هێزەكانی سوریای دیموكرات – هەسەدەوە شكست بە هێرشەكە هێنراوە.
میدیاكانی ڕۆژئاوا دەڵێن، بەهۆی هێرشەكەی توركیا و گروپە چەكدارەكانەوە هاوڵاتییەكی مەدەنی گیانیلەدەستداوە و چواری دیكەش برینداربوون.
كەمێك لەمەوبەر سوپای توركیا و گروپە چەكدارەكان دەستیانكردووە بە بۆردومانكردنی گوندەکانی تل مەزیق، شاخی نایف و بەنداوی شەهبا-ی سەر بە کانتۆنی شەهبا تۆپباران و تائێستا زیانەكانی نەزانراوە.
پێشتر ڕۆژنامەی شەرق ئەوسەت لە ڕاپۆرتێكدا ئاماژەی بە وردەكاری ئامادەكارییە سەربازییەكانی ئەو گروپانە كردووە و لەسەر زاری عەمید محەمەد حەمادی، ڕاوێژكار لە “سوپای نیشتمانیی سوریا” دەڵێت، هەنگاوەكانی ئەمدواییەیان لە یەكخستن و پێكهێنانی ژووری ئۆپراسیۆن و بەرەی سەربازی، یەكێكە لەو بنەمایانەی دەبنە هۆی دامەزراندنی دامەزراوەی سەربازی كە توانای جێبەجێكردنی ئامانجە سەربازی و سیاسییەكانی هەبێت لە باكوور و ڕۆژهەڵاتی سوریا لەلایەك و ئاسانی سەرپەرشتیكردنی پڕۆسە سەربازییەكان دژ بە هێزەكانی (هەسەدە) و ڕژێم لەلایەكی دیكەوە.
بەدوای ئەویش یەكخستنی دیكە ئەنجامدراوە وەك یەكخستنی فیرقەكانی (سوڵتان سلێمان شا، حەمزە، موعتەسەم، سقور شیمال و فیرقەی 20) لەنێو یەك پێكهاتەدا لەژێر ناوی (بەرەی ئازادیی سوریا.
