حزبوڵڵای عێراقی، كە میلیشیایەكی شیعەی چەكدارە، پێشمەرگە بە هاوكاریكردنی داعش لە كەركوك و دەوروبەری نەینەوا تۆمەتباردەكات.
ئەبو عەلی عەسكەری، بەرپرسی ئاسایشی حزبوڵڵای عێراقی لە لێدوانێكی ڕۆژنامەوانیدا ڕایگەیاندووە، “تیرۆریستانی داعش ڕاستەوخۆ لەلایەن هەواڵگرییەكانی سعودیە و ئیماراتەوە بەڕێوەدەبرێن و دەزگا تایبەتمەندەكان ئەوە دەزانن، هەركەسێكیش كارئاسانییان بۆبكات هاوبەشە لەو تاوانانەدا كە داعشەكان ئەنجامیان دەدەن”.
لێدوانی كاربەدەستەكەی حزبوڵڵا دوای ئەوە دێت، شەوی ڕابردووتر لە ناحیەی ڕەشاد لە پارێزگای كەركوك و هەروەها دەوروبەری مەخمور، چەكدارانی داعش هێرشیانكردەسەر پۆلیسی فیدراڵیی عێراق و 13 كارمەند و پلەداریان كوشت.
لەدرێژەی لێدوانەكەیدا بۆ میدیاكانی نزیك لە حزبوڵڵا، ئەبو عەلی عەسكەری وتی، “لە كەركوك و دەوروبەری نەینەوا، “میلیشیای پێشمەرگە” ئاسانكاری دەكات بۆ جموجۆڵ و كاری تیرۆریستانی تاوانكاری داعش، بۆیە دەبێت فشاری چڕی بخرێتەسەر بۆئەوەی ناچاربكرێت پشتیوانیكردنی تەكفیرییەكان ڕابگرێت”.
