شەوی ڕابردوو 80 کۆچبەر، کە بەشێکیان کوردن، بەهۆی لەکارکەوتنی بزوێنەری یەختەکەیان لە دەریای ئیجەدا گیریان خواردبوو، ئەمڕۆ بەشێکیان لەلایەن هێزە ئەمنییەکانی یۆنانەوە ڕزگارکراون.
بەپێی زانیارییەکانی میدیای یۆنانی ئەو کۆچبەرانە لەلایەن هێزی دەریاوانیی دوورگەی “فۆلێگاندرۆس”ەوە ڕزگارکراون و سەلامەتن.
هێزی دەریاوانیی دوورگەكە ئاشکرایکردووە، ئەگەرچی هەموو کۆچبەرەکان ئێستا لە وشکانیدا نین، بەڵام سەلامەتن.
“پشتی نیوز” كە میدیایەكی كوردییە لە یۆنان، ڕایگەیاندووە، “كۆچبه‌ره‌كان كورد و میسری و سورین، له دوێنێ شه‌وەوە به هۆكارێكی نادیار بزوێنەری یه‌خته‌كه‌یان لەكاركه‌وتووە و تا ئه‌مڕۆش بێ بزوێنەر له‌ناو ده‌ریای ئیجه‌دا سووڕاونەتەوە و ژیانیان له مه‌ترسیدا بوو، بەڵام دواتر ڕزگارکراون.
شاره‌وانیی دوورگه‌ی فۆلێگاندرۆس ڕایگه‌یاندووە، پرۆسه‌ی ڕزگاركردنی كۆچبه‌ره‌كان بەردەوامی دەبێت و لە بارودۆخی تەندروستیی کۆچبەرەکان دەكۆڵنەوە.
ئەگەرچی بەهۆی نزیکبوونەوەی وەرزی سەرماوە شەپۆلی دەریاکان بەرزبوونەتەوە و دەریاکان لەبارنین بۆ گەشتکردن، بەڵام شەپۆلی کۆچبەران بەرەو ئەوروپا بەردەوامە و دۆخی ئەمنیی ئەفغانستان و ناوچەکەش پاڵنەری سەرەکیی بەردەوامیی کۆچە.
