ئەنجومەنی جێبەجێكردنی یەكگرتوی ئیسلامیی كوردستان لەبارەی یەکێک لە ئەندامە کۆنەکانیەوە لە کەرکوک ڕاگەیەندراوێکی بڵاوکردەوە و ڕایگەیاندووە، “ماوەیەکە هەندێک کەس کە یەکگرتوو نەماون خۆیان عەرزی حزبی دەسەڵات دەکەن.”
لە ڕاگەیەندراوەکەی یەکگرتوودا هاتوو، “ماوەیەكە كەسانێك كە یەكگرتووبوون و ساڵانێكە كەناریان گرتووە و هیچ پابەندییەكیان بە یەكگرتووەوە نەماوە، هەلی بازاڕی هەڵبژاردن ئەقۆزنەوە و خۆیان عەرزی حزبی دەسەڵات ئەكەن و ئەوانیش بێپەروا پێشوازییان لێئەكەن.”
ئاماژە بەوەشکراوە، “ئێمە لەم وێستگەیەدا وێڕای نیگەرانی ئەم چارەنووسە بۆ ئەو بەرێزانەی ساڵانێك هاوڕێ و هاوبیر بووین و لە ماڵی یەكگرتوودا بوونەتە خاوەنی پۆست و پلەی زانستی و ئیداری و حیزبی، دەخوازین عاقبەتیان بەخێر بگەڕێت”.
ئەنجومەنەکەی یەکگرتوو وتوشیەتی، “ڕكابەر و دۆستانی یەكگرتوو دڵنیادەكەینەوە كە كاروانی شكۆداری چاكسازی و میانڕەوی یەكگرتوو بەم سیناریۆیانە زیان ناكات و جەماوەرەكەی هەڵناخەڵەتێ و دڵقایمتر دەبێت”.
ڕاگەیەندراوەكەی یەكگرتوو لەكاتێكدایە، دەنگۆی ئەوە هەبوو ڕێبوار تاڵەبانی، سەرۆکی پێشووی ئەنجومەنی پارێزگای کەرکوک، كە كادیرێكی باڵای یەكگرتوو بوو و لەسەر پشكی حزبەكە ئەو پۆستەی وەرگرتبوو، پەیوەندیی بە پارتییەوە كردبێت.
چەند ڕۆژێك لەمەوبەریش كادیرێكی دیكەی یەكگرتوو لە سلێمانی، بەناوی نەزاكەت حەمەسەعید، پەیوەندیكردنی بە پارتییەوە ڕاگەیاند.
