قائیمقامیەتی هەولێر لە ڕوونکردنەوەیەکدا سەبارەت بە قسەی هاوڵاتییەک بۆ کەناڵێکی ڕاگەیاندن دەڵێت، “ئاو بۆ هەموو گەڕەکەکان دابینکراوە و ئاگاداری هاوڵاتییانیش کراوەتەوە ئەگەر ئاویان نەبوو پەیوەندی بکەن”.
لە ڕوونکردنەوەکەی قائیمقامیەتی هەولێردا هاتووە، ” لەسەر راسپاردە و فەرمانی سەرۆکی حکومەتی ھەرێمی کوردستان، ئاوی خواردنەوە بۆ سەرجەم ماڵ و ئەو گەڕەکانە دابینکرا و لەلایەکی تریشەوە لەسەر راسپاردەی پارێزگاری ھەولێر، ئاگاداری سەرجەم ھاوڵاتییانی شاری ھەولێر کرایەوە، ھەرماڵێک پێویستی بەتانکەری ئاو بوو لەڕێگەی ژمارە تەلەفۆنەکانی سەرجەم شارەوانییەکان دەتوانن ڕاستەوخۆ پەیوەندی بکەن و داوای تانکەری ئاوی خواردنەوە بکەن بەبەردەوامی”.
قائیمقامیەتی هەولێر ئاماژەی بەوەشکردووە، “ئەو هاوڵاتییە باسی لەوەشکردووە گوایە عارەبانەی داناوە و لەلایەن قائیمقامیەتەوە ڕێگری لێکراوە، بەڵام دەبێت ئەوە بزانرێت کە لادانی عارەبانە و زێدەڕۆیی کاری تیمەکانی شارەوانی و پۆلیسی شارەوانییە و له چێوەی یاساو ڕینماییەكانە، بەمەبەستی ڕێكخستنی شار و نەهێشتنی زێدەڕۆیی لەسەر موڵكی گشتی”.
قائیمقامیەتی هەولێر ڕاشیگەیاندووە، لەسەر هەموو ئەو قسانەی کە ئەو هاوڵاتییە کردوونی و هیچ بنەمایەکیان نییە داوای یاسایی لەسەر تۆمار دەکەن.
ماوەی دوو مانگە شاری هەولێر بەهۆی چەند کێشەیەک لە هێڵی گواستنەوەی ئاو و ڵێڵبوونی سەرچاوەی ئاوەکە، ڕووبەڕووی کەمئاوی بووەتەوە، هەوڵدەدرێت لەڕێگەی تانکەرەوە ئاو بۆ گەڕەکە کەمئاوەکان دابینبکرێت.
