دامەزراوەی “زەگبی” ئەمریكی، ڕاپرسییەكی كردووە لەبارەی بۆچوونی عەرەب سەبارەت بە ئاشتی لەگەڵ ئیسرائیل و ڕادەی پشتیوانیكردنی عەرەب لەو پرۆسەیە.
ڕاپرسییەكە بۆچوونی 3600 كەسی وەرگرتووە، كە لە سعودیە و ئیمارات و فەڵەستین و ئوردن و میسر بوون، لەگەڵ زیاتر لە هەزار ئیسرائیلی دا، لێی پرسیون: تا چەند بەرقەراربوونی ئاشتی نێوان ئیسرائیل و عەرەب-تان پێباشە؟
بەشداربووانی ڕاپرسییەكە زیاتر لە نیوەیان پشتیوانیی خۆیان بۆ ئەو پرۆسەیە دەربڕیوە. 59%ی سعودی و ئوردنییەكان و 58%ی میسرییەكان كە بەشداریی ڕاپرسییەكەیان كردووە، لەگەڵ 56%ی ئیماراتییەكان پێیان باش بووە وڵاتانی عەرەب لەگەڵ ئیسرائیل دا ڕێكبكەون و ئاشتی لەنێوانیاندا بەرقەرار ببێت.
لە ڕاپرسییەكەی دامەزراوە ئەمریكییەكەدا، 69%ی فەڵەستینییەكان ڕایانگەیاندووە، “ڕێككەوتنی ئاشتی لەگەڵ ئیسرائیل دا كارێكی نەخوازراوە.”
ڕێكخەرانی ڕاپرسییەكە، لەو كەسانەیان پرسیوە كە پشتیوانیی پرۆسەكەیان كردووە، “بۆچی پێتان باشە عەرەبەكان و ئیسرائیل ڕێكبكەون و پاڵنەرەكان چین؟” ئەوانیش ڕایانگەیاندووە، “ئاشتی، سەرەتا دەبێتە هۆی كەمكردنەوەی گرژییەكان و دواتریش كۆتاییهێنان بە ململانێ و شەڕ.”
ئیسرائیلییە بەشدارەكانی ڕاپرسییەكەش، 50%یان وتوویانە، “چارەسەركردنی ململانێ لەگەڵ فەڵەستینییەكاندا، زۆر زۆر گرنگە”، بەڵام 39%یان تەنها وتوویانە، “گرنگە.”
