پەرلەمانی کوردستان لەسەر پرسی بە تایبەتکردنی کەرتی کارەبا بانگهێشتی وەزیری کارەبایکرد و ڕوونکردنەوە درا لەسەر کاریگەری گۆڕینی ئەم کەرتە لە حکومییەوە بۆ تایبەت.
وەزیری کارەبای هەرێم لەسەر ئەم پرسە وتویەتی، “پرۆسەی تایبەتکردنی بەڕێوبردنی دابەشکردنی کارەبا سوودێکی گەورەی بۆ هاوڵاتیان و بەرژەوەندیی گشتی هەیە چ لەرووی پاراستنی ماوەکانی پێدانی کارەبا و کەمکردنەوەی ڕۆتین و کەمکردنەوەی خەرجیەکانەوە بێت یاخود لەڕووی نرخەوە بێت “.
لەسەر مافی فەرمانبەرانیش وەزیری کارەبا ڕایگەیاندووە، “ئەو فەرمانبەرانەی لەکەرتی کارەبا کار دەکەن بەهەموو ئیمتیاز و شایستەی موچە و خزمەتەوە مافەکانیان پارێزراو دەبێت”.
پێشتر وەزارەتی کارەبای هەرێم ڕایگەیاندبوو، لە کۆتایی ئەمساڵدا دابەشکردنی کارەبا لە هەرێم دەدرێت بە کەرتی تایبەت و دوای ڕاگەیاندنی ئەم هەواڵە بەشێک لە کارمەندانی وێستگەکانی کارەبا خۆپیشانداندانیان ئەنجامدا بۆ پاراستنی ماف و کارەکانیان لە ئەگەری تایبەتکردنی کەرتی کارەبا.
