جێرارد پیکێ، ئەستێرەی یانەی بەرشلۆنە هۆشداری بە یاریزانانی یانەکەی دەدات و داوایان لێدەکات دوای مێسی بەرپرسیارێتی زیاتر هەڵبگرن.
دوای بەدەستهێنانی جامی خوان گامپەر، پیکێ بە میدیاکانی ڕاگەیاند، “دەزانین پارچەیەکی گەورەمان لە پێکهاتەکەمان لەدەستدا کە ئەویش لیۆ مێسی-یە، یاریزانی بەهرەمەندی وەک ئەومان نییە، بەڵام دەبێت لە چەندین لایەنی دیکەوە بەرەوپێش بچین، چەند یاریزانێکمان دەبێت بەرپرسیارێتیی زیاتر هەڵگرن، چونکە ناچارین کێبڕکێ بکەین و ناسناوەکان ببەینەوە”.
هەروەها دەڵێت، “کاتێک باشترین یاریزانی مێژوو بەجێتدەهێڵێت، پێویستە واقیعی بیربکەینەوە و لەگەڵ ڕاستییەکاندا بژین، بەتایبەت لە هەڵسوڕاندنی تاکتیکی هێرشبەریدا، چونکە لیۆ تۆمارکەر و ڕەخسێنەری زۆرترین گۆڵ بوو”.
پیکێ لە وەڵامەکانیدا ئاماژە بە فیکەبارانکردنی ساموێل ئومتیتی بەرگریکاری فەرەنسی دەکات لەلایەن هاندەرانەوە و دووپاتیدەکاتەوە، بارودۆخەکە زۆر ئاڵۆزە، داواش لە هاندەران دەکات یاریدەدەری پێکهاتەکە بن، کە لەبەردەم سەردەمێکی نوێ و گۆڕانکاریی گەورەدایە.
