سەرۆکی حکومەتی هەرێمی کوردستان لە حەوتەمین ساڵیادی هێرشی داعش بۆ سەر شنگال پەیامێکی بڵاوکردەوە و دەڵێت، حكومەتی هەرێم بەردەوام دەبێت لە هەوڵەکانی بۆ گەڕاندنەوەی خوشک و برا ئێزدییە ئاوارەکان بۆ شوێنەکانیان، جەختیش لە گرنگی جێبەجێكردنی ڕێككەوتننامەی شەنگال و ئاساییکردنەوەی دۆخی قەزاكە دەكاتەوە.
مەسرور بارزانی سەرۆكی حكومەتی هەرێم لە پەیامەكەیدا ئاماژەی بەوەكردووە، “جینۆسایدی ئێزدییان، تاوانێكی ئەوەندە دڕندانەیە کە هەمیشە لە ویژدانی گەلی کوردستان و مرۆڤایەتی دەمێنێتەوە، بۆیە پێویستە بەردەوام بە ڕێز و شکۆوە یادی قوربانییانی ئەو کۆمەڵکوژییە بکەینەوە”.
دووپاتی كردووەتەوە، “حكومەتی هەرێمی كوردستان، بەردەوام دەبێت لە هەوڵەکانی بۆ گەڕاندنەوەی سەربەرزانەی خوشک و برا ئێزدییە ئاوارەکان بۆ شوێنەکانیان و کارکردن لەگەڵ حکومەتی فیدراڵی و کۆمەڵگەی نێودەوڵەتی، لەپێناو ئاوەدانکردنەوەی شەنگال و دەڤەرەکانی دیکەی خوشک و برا ئێزدییەکان”.
مەسرور بارزانی لە پەیامەكەیدا جەخت لە گرنگی جێبەجێكردنی ڕێككەوتننامەی شەنگال و ئاساییکردنەوەی دۆخی قەزاكە دەكاتەوە، “بۆ زەمینەخۆشکردن بۆ ئەوەی ئاوارەكان بە شێوەیەکی سەربەرزانە، بگەڕێنەوە بۆ زێدی خۆیان و دەڤەرەکەش ئاوەدان بکرێتەوە”.
دەشڵێت، “لە هەمانکاتدا هەوڵەكانیشمان زیاتر چڕ دەكەینەوە بۆ دادگاییكردنی تاوانبارانی داعش و هاوكارەکانیان و ئاشكراكردنی چارەنووسی تەواوی بێسەروشوێنكراوان”.
