ئەستێرەی دێرینی هەڵبژاردەی کامیرۆن و یانەی بەرشلۆنە، ساموێل ئیتۆ لە تۆڕی کۆمەڵایەتی تویتەرەوە ڕەخنەی توند ئاڕاستەی لێپرسراوانی گۆڤاری فرانس فوتباڵ دەکات.
لێپرسراوانی گۆڤارەکە لەسەر ڕاسپاردەی شارەزایان بۆ هەر پێگەیەک لیستێک یاریزانیان دیاریکردووە، لە پێگەی هێڵی هێرشبەری باڵی ڕاست ناوەکانی بێکهام، جارزینیۆ، کیڤن کیگان، جۆرج بێست، ستانلی ماتیۆس، لیۆ مێسی، ئارێن ڕۆبن، لویس فیگۆ، ساموێل ئیتۆ، گارینشا، دیاریکراون.
لەم بارەیەوە ساموێل ئیتۆ لە تۆڕی کۆمەڵایەتی تویتەرەوە نوسیویەتی، ” سوپاس، بەڵام من تەنها 1.2 وەرز لە پێگەی هێرشبەری باڵی ڕاست یاریمکردووە، بەڵکو 25 ساڵ هێرشبەری سەرەڕم بووم، ئەوە بێڕێزییە، فرانس فوتبوڵ، هەرچییەک بێت”.
فرانس فوتباڵ لە لیستی باشترین هێرشبەری سەرەڕمدا ناوەکانی، بێرکامپ، کرۆیف، دالگلیش، ئوزێبیۆ، ساندۆر کۆچیس، گێرد مولەر، ڕۆماریۆ، ڕۆناڵدۆ، ڤان باستن، جۆرج ویای دیاریکردووە.
بڕیارە لە مانگی کانونی یەکەمی 2020 لەسەر بۆچوون و بژاردەی 170 ڕۆژنامەنوسی جیهانی لە میدیا جیاجیاکانی ئەوروپا و جیهان، باشترین پێکهاتەی مێژوویی تۆپی پێ لەلایەن گۆڤاری فرانس فوتباڵەوە دەستنیشانبکرێت.
