بەڕێوەبەرایەتیی پۆلیسی سلێمانی ئەو تۆمەتبارەیان دەستگیرکرد، کە هۆکاربووە بۆ ئاگرەکەی دوێنێی گۆیژە و بەپێی پۆلیسی نەهێشتنی تاوانی سلێمانی ئەو تۆمەتبارە بە ئەنقەست ئاگرەکەی کردووەتەوە.
بەڕێوەبەرایەتیی پۆلیسی سلێمانی ڕایگەیاند، ئەو تۆمەتبارەی دەستگیرکراوە، دوێنێ هەینی لە شاخی گۆیژە ئاگرێکی کردووەتەوە و دواتر شوێنەکەی بەجێهێشتووە، پاشان لەلایەن چەند هاوڵاتییەكەوە ئاگرەکە کوژێنراوەتەوە و ڕێگریی لە تەشەنەسەندنی کراوە.
سەبارەت بە ناسنامەی تۆمەتبارەکە لە ڕاگەیەندراوەکەدا ئاشکراکراوە، ناوی (ی ، ق ،م) و لەدایكبووی 1999ــیە و بەپێی ماددەی 342 لەیاسای سزادانی عیراقی ڕاگیراوە و لێکۆڵینەوە لەگەڵیدا بەردەوامە.
پۆلیسی سلێمانی ئاماژەی بەوەکردووە، دوای ڕووداوەکە سەرجەم بەش و بنکەکانی سەر بە پۆلیسی سلێمانی ڕاسپێردران دەستبەجێ لێکۆڵینەوە و بەدواداچوون ئەنجامبدەن بۆ دۆزینەوە و دەستگیرکردنی ئەنجامدەری تاوانەکە.
پۆلیس دەڵێت، پاش لێکۆڵینەوەی ورد و کۆکردنەوەی زانیاری، توانرا شەوی ڕابردوو تۆمەتبارەکە بدۆزرێتەوە و دەستگیربکرێت و دەستبگیرێت بەسەر ئۆتۆمبێلەكەشیدا .
