بەڕێوەبەرایەتیی ئاسایشی سلێمانی باندێکی دزینی شوێنەواریان دەستگیرکردووە، کە دوو پەرتوكی مێژوویی تایبەت بە ئاینی مەسیحی و جوو-یان دزیوە و نرخەکەیان دەیان هەزار دۆلارە.
لە ڕاگەیەندراوێکدا ئاسایشی سلێمانی بڵاویکردەوە، بۆ ڕێگریکردن لە هەموو جۆرە مامەڵە و کڕین و فرۆشتنێک بە کەلوپەلە شوێنەوارییەکان و لە هەوڵەکانی تیمەکانی ئاسایشدا، توانیویانە باندێکی دزیکردن دەستگیر بکەن و دەستیان بەسەر دوو کتێبی بەنرخی مێژووییشدا گرتووە.
ئەندامانی باندەکە بەپێی ڕاگەیەندراوی ئاسایشی سلێمانی پێنج کەس بوون، سیانیان خەڵكی سلێمانی بوون، یەكێكیان خەڵكی هەولێر و ئەوەی دیكەشیان خەڵكی دیالە بووە.
باندەکە بەتۆمەتی دزین و مامەڵەکردن بە دوو پەرتوکی کۆنی مێژووی، کە نرخەکەیان دەیان هەزار دۆلار بووە، دەستگیرکراون، پەرتوکەکان تایبەت بوون بەهەردوو ئاینی مەسیحی و جوو، مێژووەکەی دەگەڕێتەوە بۆ هەزاران ساڵ پێش ئێستا.
ئاسایشی سلێمانی باسی لەوەکردووە، ئەو دوو پەرتوکە ئینجیل و تەورات بوون لەسەر پێست و بە ئاوی ئاڵتون نوسراون و لە خوارووی عێراقەوە پەرتوکەکانیان هێناوە و ویستوویانە بینێرنە دەرەوەی وڵات.
بەپێی ڕاگەیەندراوی ئاسایشی سلێمانی، سەرجەم تۆمەتبارەکان بەپیی ماددەی 60ی شوێنەوار دەستگیرکراون و لێکۆڵینەوە لە دۆسیەکە بەردەوامە.
لە هەفتەی ڕابردووشدا پۆلیسی بەغداد دەستگریکردنی باندێکیان ڕاگەیاند، کە پەرتوکی مێژووی ئەستێرەی داوودیان دزیبوو.
