وەزارەتی تەندروستیی عێراق دەستپێکردنی سێیەم شەپۆلی کۆرۆنای لە وڵاتدا ڕاگەیاند و كاریگەرییەكانی ئەم شەپۆلەشی بە مەترسیدارتر و توندتر لە دوو شەپۆلی پێشوو ناوبردووە، وەرگرتنی ڤاكسینیش بە گرنگ دەزانێت بۆ بەرەنگاربوونەوەی.
سەیف بەرد وتەبێژی وەزارەتی تەندروستیی عێراق لە لێدوانێكی ڕۆژنامەوانیدا ڕایگەیاند، “عێراق ڕوبەڕووی شەپۆلێکی نوێی کۆرۆنا بووەتەوە، کە مەترسیدارتر و توندتر دەبێت لە شەپۆلەكانی یەکەم و دووەمی ڤایرۆسەکە”.
داواشی کردووە ڕێکارەکانی ڕێگریکردن لە بڵاوبوونەوەی شەپۆلە نوێكە بەباشی پەیڕەوبکرێت لە بەکارهێنانی ماسک و پاراستنی دووریی پێویست، هەروەها لەگەڵ وەرگرتنی ڤاکسین.
وتەبێژی وەزارەتی تەندروستی ئاماژەی بەوەشکردووە، پلانێکی فراوانیان دەستپێکردووە بۆ دەستخستنی ڤاکسینی زیاتر و زیاترکردنی ناوەندەکانی کوتان لە بەغداد و پارێزگاکانی دیکەی عێراق.
