داهاتووی عوسمان دێمبیلیی فەرەنسی تاوەکو ئێستا لە یانەی بەرشلۆنە یەکلایینەبووەتەوە، یانەکانی مانچستەر یونایتد و یوڤانتۆس هەوڵ بۆ گواستنەوەی دەدەن.
نوێکردنەوەی بۆندی عوسمان دێمبیلیی فەرەنسی یەکێکە لەو کەیسانەی ئیدارەی یانەی بەرشلۆنە تاوەکو ئێستا نەیتوانیوە یەکلاییبکاتەوە، یاریزانەکە لە هاوینی 2022 گرێبەستەکەی کۆتاییدێت و داوای موچە و گرنگیپێدانی زیاتری کردووە، لەگەڵ ئەوەشدا ستافی خوان لاپۆرتا چەندین ئۆفەری نوێیان پێشکەشکردووە و یاریزانەکە وەڵامێکی ئەرێنی نەداوەتەوە.
ڕۆژنامەی موندۆ دیپۆرتیڤۆی کەتەلۆنی دووپاتیدەکاتەوە، یاریزانە ڕەشئەسمەرەکە پێداگری لە خواستەکانی دەکات و لەهەمان کاتدا بە ئەنقەست گفتوگۆکردن بۆ نوێکردنەوەی بۆندەکەی دوادەخات، چونکە دوو یانەی گەورەی دیکە ئامادەییان دەربڕیوە ئۆفەری باشتری پێشکەشبکەن.
بەپێی سەرچاوەکە، یانەی مانچستەر یونایتد دوای بێهیوابوونیان لە جادۆن سانچۆ بە نهێنی پەیوەندییان بە لێپرسراوی کارەکانی عوسمانی فەرەنسییەوە کردووە، تەنانەت ئیدارەی یانەی یوڤانتۆس بەهەمان موچەی پێشکەشکراوی یانەی بەرشلۆنە بۆندێکیان بۆ ماوەی پێنج وەرز خستووەتە بەردەم لێپرسراوی کارەکانی.
سەرەڕای ئەوەی یاریزانەکە لەگەڵ هیچ یەکێک لە یانەکانی دیکە و تەنانەت بەرشلۆنەشدا ڕێککەوتنی نەکردووە، بەڵام میدیاکانی کەتەلۆنیا هۆشداری دەدەن لە هەنگاونانی یاریزانەکە بە ئاڕاستەی یانەیەکی دیکە بە نرخی بێبەرامبەر.
