وەزیری کشتوکاڵ و سەرچاوەكانی ئاوی حکومەتی هەرێم، لە دوای کۆبوونەوە لەگەڵ شاندێکی ئێرانی لە تارانی پایتەختی ئەو وڵاتە، ڕایگەیاند، ئەوان لە هەوڵی بەردەوامدان بۆ هەماهەنگی زیاتر و چارەسەرکردنی کێشەی کەمئاویی سیروان و زێی بچوک.
بێگەرد تاڵەبانی، وەزیری کشتوکاڵی هەرێم لە دوای کۆبوونەوەکە ڕایگەیاندووە، “لەم سەردانەماندا بە وردی ئاماژە کرا بە هەماهەنگی زیاتری پەیوەندییەکان و چەندین بابەتی گرنگ لە نێوان هەردوولا، بەتایبەتی دیاردەی ووشکەساڵی و چارەسەرکردنی کێشەی سەرچاوەکانی ئاوی ڕووباری سیروان و زێی بچوک، کە بەهۆیەوە کاریگەریی زۆری کردۆتەوە سەر بەرهەمەکانی جوتیارانمان لەسنوری گەرمیان، ئەمە جگە لە ئاڵوگۆڕی بازرگانی و ساغکردنەوەی بەرهەمەکانی جوتیارانمان به ڕەچاوکردنی کوالێتی و یەکخستنی جۆری کارکردنی نێوان مەرزەکانی سنوری ووڵاتی ئێران و خواستی بازاڕەکانی هەردوولا”.
بە پێی وتەکانی وەزیری کشتوکاڵی هەرێم، هەوڵیانداوە میکانزمێکی نوێ بدۆزنەوە بۆ بونیادنانی پرۆژەکانی ئاودێری و بەنداوەکان بەمەبەستی سنووردارکردنی بەکارهێنانی ئاو و ئاڵۆگۆڕی پەرەپێدانی توێژینەوە زانستیەکان بەهاوبەشی لەڕێگەی تاقیگە و سەنتەرەکانی هەرێمی کوردستان و کۆماری ئیسلامی ئێران .
بێگەرد تاڵەبانی ئاشکرایکردووە، پێشنیازکراوە بە پێکهێنانی لێژنەیەکی هاوبەش بە بەشداری کۆمپانیاکانی وەبەرهێنان لە نێوان هەردوولادا بۆ پەرەپێدانی ئاڵوگۆڕی بازرگانی و پیشەسازیی کشتوکاڵی و ئاودێری.
