مەرقەدی گوندی عەبابەیلێ لەلایەن كەسانی نەناسراوەوە سوتێنرا و ئەنجومەنی گوندەكەش بە هەوڵی گێرەشێوێن و ترسنۆکانە ناویدەبات.
لەلایەن كەسانی نەناسراوەوە ئەمڕۆ چوارشەممە هەوڵی تێكدان و سوتاندنی مەرقەدی و ئارامگەی (ئەبو عوبەیدە) كە دەكەوێتە گوندی عەبابەیلێ لە پارێزگای هەڵەبجە درا و بەهۆیەوە زیان بە بەشی دەرەوەی ئارامگەكە گەیەنرا.
پەیامنێرمان لە هەڵەبجە پێی ڕاگەیاندین، هێزەكانی ئاسایش گەیشتوونەتە شوێنی ڕووداوەكە و لێكۆڵینەوەیان دەستپێكردووە.
لای خۆیەوە ئەنجومەنی گوندەكە ڕونكردەوەیەكی بڵاوكردووەتەوە و دەڵێت، ئیدانەی سوتاندنی مەرقەد و ئارامگاكە دەكەین و دەکەین و “بەتوندی مەحکومی دەکەین و بێگومانین ئەوە دەستێکی گێرەشێوێن و ترسنۆکانەیە”.
ئەنجومەنی گوندەکە داواش لە لایەنی پەیوەندیدار دەكات بەزوویی بەکاری خۆیان هەستن بۆ دۆزینەوەی ئەنجامدەرانی.
