وەزارەتی تەندروستیی هەرێمی کوردستان ئاماری 24 کاتژمێری ڕابردووی کۆرۆنای بڵاوکردەوە و بەوپێیەش 717 کەس تووشی کۆرۆنا بوون و نۆ کەسیش گیانیان لەدەستداوە.
لە ڕاگەیەندراوێکدا وەزارەتی تەندروستیی هەرێمی کوردستان ئاشکرایکرد، “لە هەولێر 211 کەس، سلێمانی 199 کەس، دهۆک 263 کەس، گەرمیان 39 کەس و لە ڕاپەڕینیش پێنج کەسی دیکە تووشی ڤایرۆسی کۆرۆنا بوون”.
بەپێی ڕاگەیەندراوەکە لە شەو و ڕۆژی ڕابردوودا هەزار و 51 کەس چاکبوونەتەوە.
هەروەها نۆ کەس گیانیانلەدەستداوە، کە چواریان لە سلێمانی، چوار لە دهۆک و کەسێکیش لە هەولێر بوون.
بەپێی ئامارە فەرمییەکانی وەزارەتی تەندروستیی هەرێمی کوردستان تاوەکو ئێستا 155 هەزار و 668 کەس تووشی کۆرۆنا بوون، لەوژمارەیەش 134 هەزار و 471 کەسیان چاکبوونەتەوە و چوار هەزار و 88 کەسیان گیانیان لەدەستداوە.
