جێگری سەرۆكی حكومەتی هەرێم سەرپەرشتیی کۆبوونەوەیەکی تایبەت بە وشکەساڵی كرد، ئاشكرایكرد، بودجەیەك تایبەت بە وشكەساڵی تەرخاندەكرێت.
قوباد تاڵەبانی، جێگری سەرۆكی حكومەتی هەرێمی كوردستان ئەمڕۆ دووشەممە كۆبوونەوەیەكی بە ئامادەبوونی بریکاری وەزارەتی کشتوکاڵ و سەرچاوەکانی ئاو، پارێزگارانی (هەولێر، سلێمانی، دهۆك و هەڵەبجە)، سەرپەرشتیارانی ئیدارەكانی ڕاپەڕین و گەرمیان و نوێنەرانی وەزارەتەکانی شارەوانی و پلاندانان ئەنجامدا، كە تایبەت بوو بە شێوازەکانی ڕوبەڕوبوونەوەی وشکەساڵی لە هەرێمی کوردستان.
بەپێی ڕاگەیەندراوێكی ئەنجومەنی وەزیران، لە كۆبوونە‌وە‌كە‌دا بەوردی باس لە کاریگەرییەکانی كە‌مبارانی و وشكەساڵی لەسەر ناوچە جیاجیاکانی هەرێم کرا، پلانی حكومە‌ت و لایە‌نە پە‌یوە‌ندیدارە‌كان بۆ ڕوبەڕوبوونەوەی ئەو دیاردەیە خرایەڕوو.
ئاشكراشكرا، بەمەبەستی کەمکردنەوەی زیانە ئابورییەکانی وشکەساڵی لەسەر سێکتەرە جیاوازەکان، بودجەیەکی تایبەت تەرخانکرا و بڕیاردرا ئەولەویەت بدرێت بە زامنکردنی دابینکردنی ئاوی پاک بۆ هاوڵاتییان، هەروەها گرنگی بدرێت بە پڕِۆژەکانی کەرتەكانی کشتوکاڵ و پیشەسازی.
لە بەشێكی دیكەی ڕاگەیەندراوەكەدا هاتووە، لەدوای تاوتوێکردنی هەمەلایەنەی شێوازەکانی ڕوبەڕوبوونەوەی ئەم دیاردەیە لەسەر هەرێمی کوردستان، پێویستیی دانانی پلانی گونجاو و تەرخانکردنی بودجەی پێویست دووپاتکرایەوە بۆ دروستکردنی بەنداوی بچوک، لەپێناو گلدانەوەی ئاوی باراناو و دواتر سودلێوەرگرتنەوەی لە بواری کشتوکاڵیدا.
لە کۆبوونەوەکەدا بڕیاردرا لەگەڵ حکومەتی فیدراڵ ئەم پرسە باسبکرێت، بۆ ئەوەی هاوکاربن لە چارەسەرکردنی هەر گرفتێکدا، کە ڕوبەڕووی هەرێم ببێتەوە بەهۆی کاریگەرییەکانی وشکەساڵییەوە.
دوپاتیشكرایەوە، دەبێت حکومەتی هەرێمی کوردستان لەڕێی کەناڵە دیپلۆماتییەکانیەوە لەگەڵ وڵاتانی دراوسێ هەماهەنگی بکات بۆ کۆنتڕۆڵکردنی شێوازەکانی بەردانەوەی ئاوی بەنداوەکان، بەجۆرێک، کە بە‌رژە‌وە‌ندیی هەرێمی کوردستان لە‌بە‌رچاوبگیرێت و ئەو بارگرانییە کەمبکاتەوە، کە بەهۆی وشکەساڵییەوە ڕوبەرووی ناوچەکە دەبێتەوە.
