مردنی بەرپرسێكی فەیلەقی قودس-ی ئێران ڕاگەیەنرا و ئەمەش دووەم بەرپرسی ئەو هێزەیە لەماوەی سێ ڕۆژدا گیان لەدەستبدات.
تەلەفزیۆنی ئێران ئەمڕۆ سێشەممە بڵاویكردەوە، لیوا محەمەد عەلی حەق بین، یەكێك لە بەرپرسانی فەیلەقی قودس و یەكێك لە گەورە ڕاوێژكاران لە سوریا و عێراق، كە هاوشانی قاسم سولەیمانی، فەرماندەی پێشووی فەیلەقی قودس دژ بە ڕێكخراوە تیرۆرستییەكان جەنگاوە بە كۆرۆنا گیانی لەدەستداوە.
محەمەد عەلی حەق، بەهەمان شێوە یەكێك بووە لە ڕاوێژكارانی فەرماندەی هێزە وشكانییەكانی سوپاسی پاسدارانی ئێران.
یەكشەممەی ڕابردووش سوپای پاسداران مردنی لیوا محەمەد حیجازی، جێگری فەرماندەی فەیلەقی قودس-ی بەهۆی جەڵدەی دڵەوە ڕاگەیاند.
محەمەد حیجازی لە كانونی دووەمی 2020 لەلایەن فەرماندەی سوپای پاسدارانی ئێران بۆ ئەو پۆستە دەستنیشانكرا.
سەبارەت بە مردنی حیجازی، محەمەد مەهدی هەمت، كوڕی بەرپرسێكی پێشووی سوپای پاسداران گومانی خۆی لەبارەی مردنیەوە بە جەڵدە نیشاندا.
س: RT
