سەرۆکی فیدراسیۆنی تۆپی پێی جیهان “فیفا”، جیانی ئینفانتینۆ لە کۆنگرەیەکی ڕۆژنامەوانیدا ڕەخنەی توند ئاڕاستەی یانە دامەزرێنەرەکانی خولی سوپەری ئەوروپی دەکات.
ئینفانتینۆ لەبارەی ڕاگەیاندنی “سوپەرلیگ” و جیابوونەوەی 12 یانە گەورەکە لە چامپیۆنزلیگ، ڕایدەگەیەنێت، ” زۆر بەتوندی پاڵەوانێتی سوپەرلیگ ڕەتدەکەینەوە، لەبەرئەوەی خولێکی داخراوە، ئەوەی ڕوودەدات جیابوونەوەی دامەزراوە وەرزشییە ناوخۆییەکان و ئەوروپییەکانە، هەروەها ئەوروپا و فیفایە لە یەکدی، بێگومان فیفا دژی سوپەرلیگە، من وەک سەرۆکی فیدراسیۆنی تۆپی پێی جیهان، لێرەم بۆ پاڵپشتیکردنی سەرۆکی فیدراسیۆنی ئەوروپا و سەرجەم ئەندامان و هاندەرانی هەردوو فیدراسیۆنەکە”.
لە وەڵامی پرسیارێکدا سەبارەت بەو سزایانەی “یوێفا” بەنیازە بەسەر 12 یانە گەورەکەیدا بسەپێنێت، سەرۆکی “فیفا” بە ڕاشکاوی دەڵێت، ” خەڵکی پێویستیان بەوەیە بە لەسەرخۆیی و وریاییەوە بیربکەنەوە، پێویستە بیر لە هاندەران بکەنەوە نەک دامەزرێنەران و هەموو ئەوانەی لە ڕێکخستنی خولە ئەوروپیەکاندا بەشداربوون، ئەگەر هەندێک لە یانەکان بیانەوێت ڕێگەی خۆیان بگرن و پەیڕەوی سیستمێکی دیکە بکەن، پێویستە باجی بڕیارەکەشتان بدەن، بەڵام من بیر لەوە ناکەمەوە، چونکە فیفا ڕێکخراوێکی کراوە و دیموکراتییە، هەمووان دەتوانن پێشنیازی خۆیان پێشکەشبکەن و ڕێزی دامەزراوەکان بگرن”.
لە کۆتاییشدا دووپاتیدەکاتەوە، کە فیفا بەرپرسە لە ڕاگرتنی باڵانسی یانە و هەڵبژاردەکان و دەڵێت، ” ناکرێت یانەکان بەبێ باڵانس بمێننەوە و لە نێوان پاڵەوانێتیەکانی خۆیان و هەڵبژاردە نێودەوڵەتییەکاندا بمێننەوە، هەمووان بەرپرسن و کەس لە نێوەنددا نامێنێتەوە، یان ئەوەتا دەگەڕێنەوە بۆ فیدراسیۆنی تۆپی پێی ئەوروپا یان لە دەرەوەی دەمێننەوە”.
