کیلیان مباپێی فەرەنسی لە گواستنەوەکانی هاوینی 2021 دەبێتە جێی مشتومڕی یانە داواکارەکان و تەنها دوو یانەی توانای دابینکردنیان هەیە.
ڕۆژنامەی ئاسی ئیسپانی ئاشکرایکردووە، کە کیلیان مباپێ تاوەکو ئەم ساتە بۆندەکەی لەگەڵ یانەی پاریس سانت جێرمان نوێنەکردووەتەوە و داوایکردووە لەسەر ئاستی موچە و ئیمتیازات هاوتای نێیمار دا سیلڤای بەرازیلی بکرێتەوە، کە ساڵانە بڕی 35 ملیۆن یورۆ بەدەستدەهێنێت.
بەپێی سەرچاوەکە، یانەی مانچستەر سیتی لە هاوکێشەی کڕینی مباپێ چووەتە دەرەوە و ئامادەنین بەهۆی بەرزی موچەی ئاسکە فەرەنسیەکەوە کەشی ژووری جلگۆڕینەکان تێکبدەن، هەروەها یانەی لیڤەرپوڵیش تەنها لە ئەگەری لەدەستدانی محەمەد سەڵاحی میسڕی ئامادەیە هەوڵ بۆ مباپێ بدات.
ئەو دوو یانەیەیەی بەهێزەوە لەناو هاوکێشەکەدا ماونەتەوە، یەکەمیان خودی یانەی پاریس سانت جێرمانە و بەدوور نەزانراوە داواکاری و مەرجەکانی جێبەجێبکەن، دووەمیشیان یانەی ڕیاڵ مەدریدە کە لەگەڵ پڕۆژەی نوێی یاریگای سانتیاگۆ بێرنابیۆ دەیانەوێت یاریزانێکی زەنگۆڵەدار بگوێزنەوە بۆ ڕیزەکانیان.
