کیلیان مباپێی فەرەنسی ئەستێرەی یانەی پاریس سان جێرمان، بە تۆمارکردنی هاتریک بەرانبەر یانەی بەرشلۆنە توانی لە ململانێی باشترین لاوانی گۆڵکار بە درێژایی مێژووی تۆپی پێی ئەوروپا پێش مێسی و کریستیانۆ بکەوێت.
ئاسکە فەرەنسیەکە تەمەنی 22 ساڵە و تاوەکو ئێستا لە کۆی 41 ڕوبەڕوبوونەوە لە خولی یانە پاڵەوانەکانی ئەوروپا توانیویەتی 24 گۆڵ و 16 ئەسیست تۆماربکات.
لە هەمان تەمەندا (22 ساڵ)، لیۆ مێسی ئەفسانەی زیندووی یانەی بەرشلۆنە لە 33 یاریدا بەشداریکردووە و 17 گۆڵ و حەوت ئەسیستی تۆمارکردووە، کریستیانۆی ناسراو بە کوڕە ناوازەکەی پۆرتوگال پێویستی بە تێپەڕاندنی 26 یاری بووە بۆ بەشداریکردن لە خولی یانە پاڵەوانەکان و لەگەڵ گەیشتنی بە یاری ژمارە 30 بۆ یەکەمجار لە 2007 بەرانبەر ڕۆما دوو گۆڵی تۆمارکردووە.
مباپێ لەم وەرزەدا لەسەرجەم خول و پاڵەوانێتیەکان 16 گۆڵی تۆمارکردووە و هێشتا زۆری لەبەردەمدا ماوە بۆ تۆمارکردنەوەی ڕیکۆردە مێژووییەکانی پوڵگا و دۆنی پۆرتوگال.
کریستیانۆ لە تەمەنی 36 ساڵیدا توانیویەتی 134 گۆڵ لە خولی یانە پاڵەوانەکان تۆماربکات و ببێتە گۆڵکاری مێژوویی خولەکە، پاشان مێسی دێت بە تۆماری 119 گۆڵ، هەروەها لە نێوان ئەم دوو یاریزانەدا 11 خەڵاتی باڵۆندۆر دابەشکراوە و کریستیانۆ بەتایبەت پێنج جامی چامپیۆنزی بەرزکردووەتەوە.
