بەپێی ئەو ڕێوڕەسمانەی کە بۆ دەستبەکاربوونی پارێزگاری نوێی هەولێر دەگیرێتەبەر، بڕیارە ئەمڕۆ پێنجشەممە 18ی شوبات پارێزگاری نوێی هەولێر مەرسومی سەرۆکایەتیی بۆ دەربچێت و ڕێکارەکانی دیکەی دەستبەکاربوونی تەواو بکرێت.
ئومێد خۆشناو، پارێزگاری دیاریکراو لەلایەن ئەنجومەنی پارێزگای هەولێرەوە ئەمڕۆ دەچێتە باڵەخانەی سەرۆکایەتیی هەرێمی کوردستان و لەکاتژمێر 11:00ی پێشنیوەڕۆ سوێندی یاسایی دەخوات بۆ دەستبەکاربوونی وەک پارێزگاری نوێی هەولێر.
لەلایەکی دیکەوە سەرچاوەیەک بە تۆڕی میدیایی ئێستای ڕاگەیاند کە ئەمڕۆ ڕێوشوێنەکانی دەستبەکاربوونی پارێزگاری نوێ تەواو نابێت، واتە مەرسومی سەرۆکایەتی و سوێندخواردنی پارێزگار پێویستی بەچەند قۆناغێکە کە دەبێت بچێتە وەزارەتی ناوخۆ و چەند دامودەزگایەکی پەیوەندیدار دواتر پارێزگار دەستبەکار دەبێت بۆیە ئەمڕۆ ناتوانرێت ڕێکارەکان تەواو بکرێت.
لە بەرواری 8ی شوبات، ئەنجومەنی پارێزگای هەولێر لە کۆبوونەوەیەکی تایبەتدا ئومێد خۆشناوی بە 42ەمین پارێزگاری هەولێر هەڵبژارد و لە کۆی 23 ئەندامی ئەنجومەنی ئامادەبوو توانی 18 دەنگی ئەندامانی ئەنجومەن بەدەستبهێنێت.
ئەمە دوای ئەوەی لە ڕۆژی 2020/11/18 فەرسەت سۆفی پارێزگاری کۆچکردووی هەولێر، لە نەخۆشخانەیەکی شاری ئەنقەرەی تورکیا بە نەخۆشی کۆچی دواییکرد.
