ئەو 50 هەزار بەرمیل نەوتەی کە لەنێوان هەرێمی کوردستان و حکومەتی عێراقدا بووەتە مایەی باس و خواس، پەیوەندیی ڕاستەوخۆی بە پێدانی بەنزین و سووتەمەنیی پاڵپشتیکراو (پاڵپشتیی حکومی) بە هەرێمی کوردستانەوە هەیە.
بەپێی ڕێککەوتنەکانی نێوان وەزارەتی نەوتی عێراق و وەزارەتی سامانە سروشتییەکانی هەرێمی کوردستان، پێویستە هەرێمی کوردستان ڕۆژانە بڕی 50 هەزار بەرمیل نەوتی خاو لە کێڵگەکانی خۆیەوە ڕادەستی پاڵاوگەکانی حکومەتی فیدراڵ (یان پاڵاوگەکانی ژێر سەرپەرشتیی وەزارەتی نەوت) بکات؛ ئەم نەوتە وەک کەرەستەی خاو بەکاردێت بۆ ئەوەی لە پاڵاوگەکاندا بپاڵێورێت و بکرێتە سووتەمەنی (بەنزین، گازوایل و نەوتی سپیی ماڵان).
بەپێی ڕێککەوتنەکە، لە بەرامبەردا، حکومەتی عێراق پابەند دەبێت بە ناردنی بەنزینی پاڵپشتیکراو بۆ هەرێمی کوردستان بۆ ئەوەی بە نرخێکی هەرزان و ڕەسمی (750 یان 850 دیناری) دابەشبکرێت.
لێرەدا دوو ڕووانگە باسدەکەین:
ڕووانگەی بەغداد: حکومەتی عێراق دەڵێت، تاوەکو حکومەتی هەرێمی کوردستان ڕۆژانە بەشێوەیەکی بەردەوام و بێ پچڕان ئەو 50 هەزار بەرمیل نەوتە خاوە ڕادەست نەکات، ناردنی بەنزینی حکومی ڕادەگرێت یان کەمی دەکاتەوە.
ڕووانگەی هەولێر: حکومەتی هەرێمی کوردستان دەڵێت، لەبەر ئەوەی بەشێک لە نەوتەکەی بۆ پاڵاوگە ناوخۆییەکان یان بەکارهێنانی ناوخۆ دەڕوات، هەندێکجار ئاستەنگی تەکنیکی، دارایی یان سیاسی دروستدەبێت لەبەردەم ڕادەستکردنی ڕێک و ڕەوان و ڕۆژانەی تەواوی 50 هەزار بەرمیلەکە بە وەزارەتی نەوتی عێراق.
لە دەرئەنجامدا، کاتێک ناردنی ئەم 50 هەزار بەرمیلە دوادەکەوێت یان دەبێتە کێشە، وەزارەتی نەوتی عێراق ڕێژەی بەنزینە پاڵپشتیکراوەکە (نۆرمال/موحەسەن) بۆ هەرێمی کوردستان دەبڕێت یان زۆر کەمی دەکاتەوە، ئەمەش وادەکات قەیرانی بەنزین دروستببێت.
بۆیە بەهۆی کەمبوونەوەی بڕی بەنزینی حکومی، بازاڕی هەرێمی کوردستان زیاتر پشت بە بەنزینی بازرگانی و هاوردەکراو دەبەستێت، کە ئەم جۆرەی بەنزینیش لەسەر نرخی بۆرسەی جیهانییە و تێچووی گواستنەوەی لەسەرە، بۆیە نرخی یەک لیتر بەنزین لە بەنزینخانە ئەهلییەکان بەرزدەبێتەوە و فشار دەکەوێتە سەر گیرفانی هاووڵاتییان.
