پۆلیسی سلێمانی، ڕایگەیاند، تۆمەتبارێک دەستگیرکرا کەبڕی سێ دەفتەر دۆلاری دزیبوو.
بەڕێوەبەرایەتیی پۆلیسی پارێزگای سلێمانی، ڕایگەیاند، دوای ئەوەی هاوڵاتییەک سکاڵای تۆمارکرد لە نووسینگەی نەهێشتنی تاوانی ناوبازاڕ کە بڕی سێ دەفتەر دۆلاری ئەمریکی لەناو زەرفێکدا لەناو بازاڕی شاری سلێمانی لێدزراوە، بڕیاری دادوەر بۆ دۆسییەکە وەرگیراو دوای لێکۆڵینەوە و بەدواداچوونەکان، زانیاریی پێویست کۆکرایەوە و توانرا لەلایەن مەفرەزەکانی نەهێشتنی تاوانەوە بەسوودبینین لە کامێراکانی چاودێری تۆمەتبار بدۆزرێتەوە و دەستگیربکرێت.
دەشڵێت، دەستیش بەسەر بڕی 25 هەزار و 350 دۆلاردا گیرا کە تۆمەتبار لەماڵەکەیدا شاردبوویەوە.
ئاماژە بەوەشدەکات، ئێستا تۆمەتبار بەبڕیاری دادوەر و بەپێی ماددەی ( 446) لە یاسای سزادانی عێراقی ڕاگیراوە و لێکۆڵینەوە لەگەڵیدا بەردەوامە.
