شارەزایەکی بواری کەشناسی، وادەی دەستپێکردنەوەی بارانبارین ئاشکرادەکات.
ئاراس جەبار، شارەزای بواری کەشناسی ڕایگەیاند، سبەی پێنجشەمە 2ـی 4ـی 2026، لە کاتەکانی بەیانییەوە شەپۆلێکی بەخوڕی بارانبارین و هەورەبروسکە لە دەریای ناوەڕاستەوە چالاکدەبێتەوە بۆ ناوچەکانی باشووری تورکیا و وڵاتی یۆنان و کەناراوەکانی ڕۆژئاوای سوریا و بە لاوازییش کاریگەریی دەبێت لەسەر کەشوهەوای ناوچەکانی عێراق و هەرێمی کوردستان و ئاسمانی ناوچەکە بەزۆری دەگۆڕێت بۆ هەوری تەواوی بەرز و مامناوەند.
ڕاشیگەیاند، لە کاتەکانی دواینیوەڕۆ تا کاتەکانی شەو، هەوری نزم دەگاتە ناوچەکانمان و ئەگەری بارینی بارانێکی مامناوەند و پچڕپچڕ دەبێت لە هەندێک شوێندا، بەتایبەت لە ناوچەکانی سنووری پارێزگای دهۆک، هەولێر، نەینەوا، ئیدارەی سۆران و ڕاپەڕین کاریگەریی زیاتر دەبێت و لە ناوچەکانی سنووری پارێزگاکانی سلێمانی، هەڵەبجە، کەرکوک و ئیدارەی گەرمیان، ئەگەری بارانێکی کەم و پچڕپچڕ دەبێت.
دەشڵێت، پلەی گەرمی بە ڕێژەی 2 پلە بەراورد بە ئەمڕۆ چوارشەممە بەرزتردەبێتەوە و خێرایی با لەسەرخۆ دەبێت.
