سکرتێری لقی سلێمانیی سەندیکای رۆژنامەنووسانی کوردستان رایدەگەیەنێت، بڕیاری داخستنی نووسینگەکانی کەناڵی NRT لە هەولێر و دهۆک، بەبێ پرسکردن بە سەندیکای رۆژنامەنووسان و وەزارەتی رۆشنبیری، دەرکراوە و جێبەجێکراوە.
کاروان ئەنوەر، سکرتێری لقی سلێمانیی سەندیکای رۆژنامەنووسانی کوردستان، بە تۆڕی میدیایی ئێستای راگەیاند، داخستنی کەناڵی NRT لەم کاتەدا کە هەموو میدیا کوردییە جۆراوجۆرەکان و شەقامی کوردیی بە یەک دەنگ و یەک گوتار، پاڵپشتیمان لە بابەتێکی نەتەوەیی کردووە، لە دۆخێکی لەم شێوەیەدا ئەم کارەی کە کراوە نیگەرانییەکی گەورە دروستدەکات.
وتیشی، ئەم بڕیارە بەبێ پرسکردن بە سەندیکای رۆژنامەنووسان و وەزارەتی رۆشنبیری، دەرکرا و جێبەجێکراوە، ئەو یاسایەی پارتی پشتیپێبەستووە لاستیکییە و پشتبەستوو نییە بەو یاسایانەی لەوبارەیەوە بەرکارن، چونکە بڕیاری راگرتنی هەر میدیایەک دەبێت بەگوێرەی پڕەنسیپ و یاساکانی وەزارەتی رۆشنبیری بێت.
ئاماژەی بەوەشکرد، بڕیاری داخستنی نووسینگەی کەناڵی NRT لە هەولێر و دهۆک جێبەجێکراوە، بەڵام لە سلێمانی، هەڵەبجە، گەرمیان و راپەڕین ئەم بڕیارە جێبەجێناکرێت، تاوەکو نەچێتەوە خانەی یاسایی جێبەجێکردنەوە.
