ستران عەبدوڵڵا: نەتەوەیەک لەسەر کاغەزەوە بۆ سەرتاسەری کوردستان

ستران عەبدوڵا، ئەندامی ئەنجومەنی سەركردایەتیی یەكێتیی نیشتمانیی کوردستان، نووسینێکی لە هەژماری خۆی بڵاوکردووەتەوە و ئەمەی خوارەوە دەقەکەیەتی:
‎کە یاداشتی تێکۆشەرانی دێرین دەخوێنینەوە باسی کۆمار تاقانە لە مەهاباد و باسی کۆماری سووری دوورە دەست و باسی شۆڕش و باسی دەرسیم و دیاربەکرە. وا دەخوێنییەوە کە هەرای مەهاباد و هەڵڵای دیاربەکر و دەرسیم قەوما یان دێتەبەر گوێ کە شێخ مەحمود شۆڕشی کرد و چوار ئەفسەرەکە لە جلانەوەی موکریان بەشدارییان کرد و لە بەغداد لەسێدارەدران. قاسد ناوی سێ سنوور دێنێ دەڵێن زەبیحی لە ژێکاف بەشداربووە و لە قامیشلو ناوی (عەرەفات) و لەسەر سنووری دوو بەشی کوردستان سەرنگوم بووە. دەڵێن و دەوترێ و دەنووسرێ و رەنگە ساڵی دواتر هەواڵ گەیشتبێ. ئەمێستا لە سلێمانی لایڤە و لە کۆبانێ راستەوخۆ و لە پاریس و بەرلین، نوسێبین و خانەقین، لە دهۆک و کەرکوک ئازار یەکە و ئازادی خولیایە و ئازایەتی پێشبڕکێیە لە نێوان لاوانی کورد لە سەرتاسەری دونیا.. تۆڕەکانی سۆشیال میدیا و سەکۆکانی پەیوەندی شۆڕشێکیان بەرپاکردووە و کچان و کوڕانی کوردپەروەر بوونەتە بەشێکی سەرەکی لە دیمەنی پێشبڕکێیەکە.
سەرەتا بە خۆڕسکی و بە هیمەت و هاندانی نەتەوەیی دەستیپێکرد و ئێستا بووەتە تۆڕی فراوان و رێکخراوی رێکوپێکی چالاکی و خشتەبەندی بۆنەکان.
لە کەرکوک کۆمەکە و لە سلێمانی کەمپین، لە هەولێر و دهۆک دروشم و درود و بانگەواز و بەهاناوە چوونە و لە رۆژئاوا سەنگەربەندی و لە رۆژهەڵاتیش سەبری شۆڕشگێڕی، لە باکوور سنوور ترازان و ستران و سرود و سەد جۆری چالاکی پشتیوانن.
دیمەنەکان زۆر و زەق و زیندوون خوێنی ئاڵ و جلی ئاڵوواڵا، کەزی و پەلک و جلک و داهێنان لە نمایش و نواندن. ئەمانە گشتی ئاماژەن، بەڵێ ئاماژەن و نەبەردییەکی رەمزین، چونکە ئەمڕۆ دونیاش پێش جەنگی راستەقینە مانۆڕی هێز و خۆنواندن و خۆسەپاندن و پێش خوێنبەخشین خوێندنی سروود و نزا و سروتە. تەنانەت بابە گەورەکانی د.ا.عـ.ـشـ.ـە هەمەجۆرەکان و نەوە جیاجیاکانیان لە بیریانە لە 11ی سێپتەمبەری ساڵی 2001، چوار فڕۆکە لە رەمزی دیموکراسی ئەمریکا (کۆنگرێس) و رەمزی هێز(پنتاگۆن) و رەمزی سەرمایە و ئابوری (دوو تاوەری نیۆورک) و رەمزی شکۆی ئەمەریکا (کۆشکی سپی) یان دا و ئەو کاتیش وەک ئێستا هەر جەزیرە پاکانەی بۆ دەکردن. ئیتر د.ا،.عـ.ـش زەینەکان بۆ گاڵتەیان بە (کەزی)ـی کچی کورد و بە دیبلۆماسی پەلک و جلکی کوردەواری و جامانەی کوردایەتی نەرم و مەدەنی دێت گوایە هیچیان پێ ناکرێت؟ وا زاراوە و سروود و ئاوازەکانی هەموو تێکەڵ دەبێت و لە سلێمانی سێکۆچکەی بابان (کینە ئەم؟)ـی جگەرخۆێن دەنگی زوڵاڵە، ئەمە چۆن شۆڕشی نەتەوەیی نییە کە قامیشلۆ دەڵێ (هەر کوردین و هەر کورد ئەبین) و ئاڵای کوردستان سەرووی هەموو ئاڵایەکەوەیە؟!
لەگەڵ ئەوەشدا لە گۆڕەپانی کوردستان هەر سروود و (رسوم وعاداتی کوردانەیە). وا لە کۆبانێ شەڕە و بەرخودان، لە ئەشرەفیە و شێخ مەقسود شانازی کۆڵنەدان و دیلانی پێش شەهادەتە. لە حەسەکە بەرەنگارییە بەرامبەر سوپای ئیغۆر و چیچانی و جەیشی عەرەبی سوری کۆنە بەعسییەکان. لە رۆژئاوا ریزبەندی و ریزبەستن و رێزگرتنە لە هاوکاری و کاروانی کۆمەکەکان.
لەناو ئەم دیمەنە قەرەباڵغەدا، بەڵام رەنگاورەنگانە پێشمەرگە و ئاسنگەرێکی کەرکوکیش هەیە کە کورەی کاوەی جۆشداوە. شەهید ئەحمەد هێمن کەرکوکی غیرەتپەروەر و پیشە ئاسنگەر کە سنووری دەستکردی کوردستانی بڕیوە و مەرجی شەهادەتی گەیشتووەتە مەیدان و بە شایەتی و شەهیدی و قارەمانییەوە دەگەڕێتەوە بابەگوڕگوڕ.
ریزبەندیی ناوەکەی چەند سەرنجڕاکێشە و چەند چیرۆکی دەماودەمی فرەیی کوردەواری دەگێڕێتەوە: باوک (هێمن)، کە دیارە تەوژمی نەتەوەیی پڕجۆش و خرۆشی شاری تەعریبکراو ئەم ناوە (هێمن) و هێور و ئارامەی پێ رەوا بینیوە.. چیرۆکی رەوای نەتەوە (ئەحمەد) ی کوری هێناوەتەوە سەر هەمان رێچکەی کوردایەتی پاپیران.. جا چونکە بۆ (هێمن)ی و (ئارامی) و شاری پێکەوە ژیان دایمە خوێنبەخشین خەڵات و پێویستە تا لەبیرمان بێ نەبەردی زۆرترمان ماوە.
حەسەکە بە زاراوە قەڵەمرەوی کرمانجە و دەستەخوشکی دهۆکە بە پیت و قەڵەم و نووسین هاورازی باکوور و ماکۆیە. بەڵام بە ئازار و پەژارەی سیاسەتی تەعریب و حیزامی عەرەبی و بێ ناسنامەیی شەریکی ئازاری کەرکوک و خانەقینە لە سێکوچکەی تەعریب و تەبعیس و تەرحیل و لە چارەنووسی تەسفیردا، بەعسی هەردوولا هەر بەعسە و سەید کاکە وتەنی کڵاشی هەورامییە کە چەپ و راستی بۆ نییە. عەفلەقی جاران و مۆڵەقی تیرۆرستی ئەمڕۆیان هەر تینوون بە خوێنی سەری کورد .
چارەنووسی بابەگوڕگوڕ هەر وایە کە ئەم شتانەی بە جددیە، نەبەردی رەمزی بێت یان نەبەردی راستەقینە هەریەکە و هەر لەکە و هاوار و بانگەوازی وایە: یەک یەکە کوردستان یەکە.
دەیان ساڵی پێشتری سەدەی بیستەم عەبدوڵڵا گۆرانی مەزن لە پەسەندی سالمی ساحێبقراندا مژدەی هۆشیاری نەتەوەیی دابوو: بنوو لە قەبرەکەتا، موستەریح بە، ئەی سالم، لەتۆ کوردترە ئێستا “نەزان” هەتا “عالم”.