وەزارەتی دارایی و ئابوریی هەرێمی کوردستان رایدەگەیەنێت، تائێستا هیچ رێککەوتن و بڕیارێکی نوێ بۆ دابەشکردنی مووچە لەئارادانییە.
وەزارەتی دارایی و ئابوریی هەرێمی کوردستان لە راگەیەندراوێکدا بڵاویکردەوە، سەبارەت بە رێکارەکانی خەرجکردنی مووچەی فەرمانبەران و مووچەخۆرانی هەرێمی کوردستان بۆ ساڵی 2026، ماوەی چەند رۆژێکە چەندین لێدوان و شیکردنەوە و لێکدانەوەی نادروست لەسەر ئەو بابەتە لە بەشێک لە میدیاکانەوە بڵاودەبێتەوە، بە پێویستمان زانی، ئەم بەرچاوڕوونییانە بخەینەڕوو.
1- تائێستا لە وەزارەتی دارایی حکومەتی فیدراڵەوە هیچ بڕیار و رێنماییەک سەبارەت بە رێکارەکانی خەرجکردنی مووچە بۆ ساڵی دارایی 2026 نەگەیشتووەتە وەزارەتی دارایی هەرێمی کوردستان.
2- تائێستا هیچ رێککەوتن و بڕیارێکی نوێ بۆ دابەشکردنی مووچە لەئارادانییە.
3- وەزارەتی دارایی و ئابوری هەروەک ساڵانی پێشوو، بەردەوامە لەسەر جێبەجێکردنی هەموو هەنگاوەکانی دابەشکردنی مووچە.
4- هیچ کێشەیەک لەبەردەم وەزارەتی دارایی حکومەتی هەرێمی کوردستاندا نییە بۆ ناردنی راپۆرتی تەرازووی پێداچوونەوە و لیستی مووچە و چاوەڕێی ئەنجامەکانی خاڵی یەکەمە (واتە بڕیار و رێنمایی نوێ بۆ خەرجکردنی مووچە لە ساڵی 2026).
دەشڵێت، تکایە هەر کەس و لایەنێک کە شارەزای ئەم رێککەوتن و رێنمایی و رێکارانە نییە، زانیاریی هەڵە لەسەر لیستی مووچە و بابەتی 120 ملیار دینارەکە بڵاونەکاتەوە، تا لەو رێگەیەوە بیەوێت بۆ دەستکەوتی کەسی یان سیاسی، یاری بە هەست و سۆزی فەرمانبەران و مووچەخۆران بکات. بۆ چەندهەمین جار چەندبارەی دەکەینەوە، هەر کەس و لایەنێک پێویستی بە زانیاری هەیە لەو بارەیەوە، دەرگای وەزارەتمان ئاوەڵایە.
