دانیشتنی ئەنجومەنی نوێنەرانی عێراق دواخرا

ئەنجومەنی نوێنەرانی عێراق دانیشتنەکەی ئەمڕۆی بۆ سبەی یەکشەممە دواخست.

نووسینگەی راگەیاندنی ئەنجومەنەکە لە راگەیەندراوێکدا بڵاویکردەوە، “پاش دەنگدان لەسەر راسپاردەیەک بۆ وەزارەتی پەروەردە لەبارەی گەڕاندنەوەی کارکردن بە سیستمی چاککردنی تێکڕای نمرەکان (تەحسین معەدەل) بۆ ساڵی خوێندنی 2024-2025 و وەرگرتنەوەی ئەو خوێندکارانەی پۆلی 12 ئامادەیی کە لە یەک یان دوو وانەدا دەرناچن، لە ساڵی خوێندنی ئاییندەدا، هەروەها رێگەدان بەو خوێندکارانە بە درێژەدان بە خوێندکەیان و بەشداریکردن لە تاقیکردنەوەکان، دانیشتنی ئەنجومەنی نوێنەرانی عێراق بۆ سبەی یەکشەممە دواخرا.”

ئاماژە بەوەشدەکات، لە دانیشتنی ئەمڕۆدا، بە ئامادەبوونی بەڕێوەبەری گشتیی دەستەی گشتیی باجەکان و بەڕێوەبەری گشتیی دەستەی گشتیی گومرگ و بەڕێوەبەری گشتیی دەرەوازە سنوورییەکان، دۆسیەی داهاتە نانەوتییەکان، گفتوگۆیان لەبارەوەکرا.”