وەزیری دادی عێراق رایدەگەیەنێت، حکومەتی عێراق بڕیاری ناردنی مووچەی مانگی پێنجی دەرکردووە و دوای تەواوکردنی وردبینی مووچەی مانگەکانی دیکەش دەنێردرێت.
خالید شوانی وەزیری دادی عێراق رایگەیاند، لێکتێگەیشتنی نێوان هەرێم و بەغداد ماوەیەکی زۆرە گفتوگۆی لەسەر دەکرێت، وردەکاریی زۆری لەسەر هەناردەی نەوت و تەوتین و داهاتی نانەوتی تێدایە.
ئاماژەی بەوەشکرد، لە کۆبوونەوەی ئەمڕۆیدا ئەنجومەنی وەزیران بڕیاریدا، مووچەی مانگی پێنج خەرجبکرێت، مووچەی مانگەکانی دیکەش دوای وردبینیکردنی لەلایەن لیژنە تایبەتمەندەکانەوە خەرجدەکرێت.
جەختیشیکردەوە، ئەم رێککەوتنە درێژخایەنە و تا کۆتایی ساڵ بەردەوام دەبێت تا ئەو کاتەی بودجەی ساڵانی داهاتوو پەسەنددەکرێت، دەتوانین بڵێین نەخشەرێگای پەیوەندییە داراییەکانی حکومەتی فیدراڵ و هەرێمە.
