بەهۆی ئەو ئاگرەی لە نزیک سنووری نێوان ئەو دوو وڵاتە کەوتووەتەوە، سووریا دەروازەی سنووریی (کەساب)ـی لەگەڵ تورکیا داخست.
مازن عەلوش، بەڕێوەبەری پەیوەندییە گشتییەکان لە دەستەی گشتیی بەندەرەکانی وشکانی و دەریایی سووریا، لە پلاتفۆرمی ئێکس رایگەیاند، “ئاگاداری ئەو کەسانە دەکەین کە لە دەروازەی سنووری کەسابەوە هاتوچۆ دەکەن، بەهۆی ئەو ئاگرکەوتنەوەیەی لە شاخەکانی سووریا و نزیک لەو دەروازەیە کەوتووەتەوە، دەروازەکە بەشێوەیەکی کاتی دادەخرێت”.
لە رۆژی 3ـی تەمموزەوە، ئاگرێکی گەورە لە لادێکانی ناوچەی لازقییە، لە سووریا کەوتووەتەوە و دەیان تیمی بەرگریی شارستانی و ئاگرکوژێنەوە، لە هەوڵی کۆنترۆڵکردنی ئاگرەکەدان.
