ئەمڕۆ لە گرێ سپی لە ڕۆژئاوای کوردستان، کە لەلایەن چەکدارانی نزیک لە تورکیاوە داگیرکراوە، خۆپیشاندانێک دژی وتەکانی ئیمانیۆل ماکرۆنی سەرۆکی فەرەنسا بەڕێوەچوو، تێیدا ئاڵای داعش بەرزکرایەوە.
ئەمڕۆ 25 ی تشرینی یەکەم چەکدارەکانی نزیک لە تورکیا خۆپیشاندانێکیان دژی وتەکانی ماکرۆن کرد کە پێشتر ڕایگەیاندبوو “ئیسلام لە قەیراندایە” و چەندین دروشمیان دژی فەرەنسا و ماکرۆن وتەوە.
لە خۆپیشاندانەکەدا ئاڵای چەکدارانی داعش و بەرەی نوسرە بەرزکرایەوە، کە هەردوو گروپەکە لەلایەن ئەوروپا و ئەمریکا و بەشێکی زۆری جیهانەوە بە گروپی تیرۆرستی ناسێندراون.
خۆپیشاندانەکەی ئەمڕۆی گرێ سپی لەکاتێکدایە کە دوێنێ ڕەجەب تەیب ئەردۆغان سەرۆککۆماری تورکیا بە توندی هێرشیکردە سەر ئیمانیۆل ماکرۆن و پێی وت “ماکرۆن دەبێت پشکنین بۆ مێشکی بکات”.
