ئەستێرەیەکی دێرینی یانەی لیڤەرپوڵ، یەکێک لە بەرگریکارانی فەرەنسا و خولی ئەڵمانیا بە فریادڕەسی یانەی لیڤەرپوڵ لە قەڵەمدەدات.
لەم وەرزەدا لیڤەرپوڵ بەهۆی ئەنجامە خراپەکانەوە دەناڵێنێت، کێشەکانی هێڵی بەرگری و پێکانی ڤێرجیل ڤان دایک و جۆ گۆمێز کاریگەرییان لەسەر هێڵی بەرگری دروستکردووە و لە کۆتا چوار ڕوبەڕوبوونەوەدا نەیانتوانیوە سەرکەوتن بەدەستبهێنن.
لەم بارەیەوە ئەستێرەی دێرینی لیڤەر و هەڵبژاردەی ئینگلتەرا، پیتەر کراوچ بە “تۆڵک سپۆرت”ی ڕاگەیاندووە، ” هەر کەسێک لەم دنیایەدا دەزانێت کە لیڤەرپوڵ پێویستی بە بەرگریکارێکە، پێموایە بەر لە کۆتاییهاتنی وادەی گواستنەوەکان یانەکە بەرگریکارێک بۆ پێگەی سەنتەر دەکڕێت”.
ئەستێرە باڵا بەرزەکە ڕوونکردنەوەی زیاتر دەدات و دەڵێت، ” ئێمە ناتوانین سیاسەتی گواستنەوەکانی لیڤەرپوڵ بگۆڕین، بەڵام ئەوەی لە دوو ساڵی ڕابردوو ڕوویدا باوەڕپێنەکراوبوو، چەندین بەرگریکاری ناوازە بوونیان هەیە، بەبۆچوونی من دایۆت ئۆپامیکانۆ بەرگریکارێکی ناوازە و بەهێزە، لە ئێستادا یەکێکە لە باشترینەکانی ئەوروپا، ئەگەر لیڤەرپوڵ بیکڕێت تەواوی کێشەکانیان چارەسەردەکات”.
ئۆپامیکانۆ تاوەکو هاوینی 2023 بۆندی لەگەڵ یانەی لایپزیچ واژووکردووە، بەڵام لە هاوینی 2021 نرخی شکاندنی بۆندەکەی بۆ 45 ملیۆن یورۆ دادەبەزێت، بەم هۆیەوە دەیان یانەی زەبەلاح چاودێرییان خستووەتەسەر.
