ئامانج رەحیم، سكرتێری ئەنجومەنی وەزیرانی هەرێمی كوردستان رایگەیاند، بەپێی بڕیاری دادگای فیدڕڵی بەهیچ شێوەیەك نابێن ناكۆكی نێوان هەرێم و بەغداد كاریگەریی نەرێنی لەسەر پرسی ناردنی مووچە هەبێت.
سكرتێری ئەنجومەنی وەزیرانی هەرێمی كوردستان لە راگەیەندراوێكدا بڵاویكردەوە، بەپێی بڕگەی (شەشەم)ە لە لاپەڕەی (15) لە بڕیاری دادگای باڵای فیدراڵی ژمارە (224 و موحدتها 269/ اتحادیە/ 2023) كە لە 21-2-2024 بڕیارێكی ملزمە بۆ هەموو دەسەڵاتەكان و نابێت هیچ یاسا و بڕیار ونووسراوێك پێچەوانەی ئەمە دەربچێت بەهیچ شێوەیەك ناكۆكییەكانی هەرێم و بەغداد نابێت پەیوەست بكرێتەوە بە مووچەی مووچەخۆرانی هەرێمەوە.
ئاماژەی بەوەشكردووە، بەپێی دەقی یاساكە، ناكۆكی نێوان حكومەتی فیدراڵی و حكومەتی هەرێم دەربارەی جێبەجێكردنی ماددەكانی یاسای بودجەی گشتی فیدراڵی كۆماری عێراق ژمارە (13)ی ساڵی 2023، و بە تایبەتی هەردوو ماددەی (12و 13)ی یاساكە، نابێت ببێتە هۆكاری سەرەكی خەرجنەكردنی موچەی مانگانەی فەرمانبەران و خانەنشینان و سوودمەندانی تۆڕی پاراستنی كۆمەڵایەتی لە هەرێم لە كاتی دیاریكراوی خۆی.
ئەوەشیخستووەتەڕوو، هەردوو ماددەی 12 و 13ی یاسای بودجە پەیوەندیدارە بە داهاتی نانەوتی و و پابەندیی نەوتی هەرێم، كە هەردو حكومەت ناكۆكیان هەیە لەسەر چۆنیەتی جێبەجێكردنی هەردوو ماددەكە.
