بەڕێوەبەرایەتیی هاتوچۆی هەولێر رایدەگەیەنێت، لە رووداوی هاتوچۆکەی ئەمڕۆ حەوت کەس بریندابوون و هیچ کەسێک گیانی لەدەستنەداوە.
بەڕێوەبەرایەتیی هاتوچۆی هەولێر لە راگەیەندراوێکدا بڵاویکردەوە، ئەمڕۆ کاتژمێر 08:30ـی بەیانی، ئۆتۆمبێلێکی تایبەت لە جۆری (تۆیۆتا ئەڤەلۆن) لە ژێر پردی رزگاری بە خێراییەکی زۆر بەرەو ئاراستەی شەقامی کەسنەزان دەڕۆیشت، کە شۆفێرێکی گەنج لێیخوڕیوە و دوو سەرنشینی هاوتەمەنی خۆی لەگەڵدا بووە (هەرسێکیان ئامۆزای یەکن) و بۆ سەر کار رۆیشتوون بۆ ناوچەی پیشەسازی.
ئاماژەی بەوەشکرد، لەکاتی لێخوڕیندا، ئەو شۆفێرە سەرکێشیی کردووە و لە ئاراستەی دەستەڕاست، لێکڕەتبوونی ئەنجامداوە، ئەمەش بووەتەهۆی ئەوەی کۆنتڕۆل لەدەستبدات و بەسەر شۆستەکەدا بچێتە رێڕەوی بەرامبەر و لە ئەنجامدا، خۆی کێشاوە بە ئۆتۆمبێلێکی جۆری تاکسی (تۆیۆتا بیکاشۆ) کە شۆفێر و سەرنشینێکی تێدابووە، پاشان خۆی کێشاوە بە ئۆتۆمبێلێکی دیکە لە جۆری (جیلی) کە ئەویش شۆفێر و سەرنشینێکی تێدابووە (کوڕ و باوک بوون).
هاتوچۆی هەولێر دەڵێت، لەئەنجامی ئەم رووداوە حەوت کەس بریندار بوون؛ سێ کەس، لە ناو ئۆتۆمبێلی ئەڤەلۆن و دوو کەس لە ئۆتۆمبێلی تاکسی و دوو کەسی دیکەش، لەناو ئۆتۆمبێلی جیلی و هیچ کەسێک گیانی لەدەستنەداوە.
