ئەمشەو، یەکشەممە ڕوبەڕوبوونەوەیەکی گرنگی گەڕی چوارەمی جامی یەکێتی یانە ئینگلزیەکان “فا کەپ” ئەنجامدرا، یانەی مانچستەر یونایتد بە بردنەوەی لە لیڤەرپوڵ گەیشتنی بە گەڕی پێنجەم مسۆگەرکرد.
لە یاریگای ئۆڵترافۆرد مانچستەر یونایتد میوانداری یانەی لیڤەرپوڵی کرد و ئەستێرەکانی سۆڵشایەر بە ئەنجامی سێ گۆڵ بەرانبەر بە دوو بردنەوەیان بەدەستهێنا.
گۆڵەکانی یونایتد لە خولەکەکانی 26 و 48 و 78 لەلایەن ماسۆن گرینوود، مارکۆس ڕاشفۆرد، برونۆ فێرناندێز، گۆڵەکانی لیڤەرپوڵیش لە خولەکەکانی 18 و 58 لەلایەن محەمەد سەڵاحەوە تۆمارکران.
سەرەڕای ئەوەی لە کۆتا چارەکی یارییەکەدا ئەستێرەکانی یۆرگن کلۆپ هەوڵی زۆریاندا بە هێرشی هەڵگەڕاوەی ڕێکخراو ئەنجامەکە یەکسانبکەنەوە، بەڵام سەرکەوتوو نەبوون و یارییەکە بە ئەنجامی سێ گۆڵ بەرانبەر دوو لە بەرژەوەندی شەیتانە سوورەکان کۆتاییهات.
بەپێی ئەنجامە تۆمارکراوەکە، یانەی مانچستەر یونایتد گەیشتنی بە قۆناغی پێنجەمی جامە مێژووییەکە مسۆگەرکرد و لیڤەرپوڵ ماڵئاواییکرد.
