بڕیارە ئەمڕۆ شەممە، نوێنەرانی ئەمریکا و ئێران لە خولی دووەمی دانوستانەکانی نێوانیان لە رۆما کۆببنەوە.
وەفدەکەی ئەمریکا لەلایەن ستیڤ ویتکۆف، نێردەی تایبەتی ئەمریکا لە رۆژهەڵاتی ناوەڕاست سەرۆکایەتیی دەکرێت و وەفدی ئێرانیش لەلایەن عەباس عەرەقچی، وەزیری دەرەوە سەرۆکایەتیی دەکرێت، هەروەها بەدر بوسەیدی، وەزیری دەرەوەی عومان رۆڵی نێوەندگیری دەبێت.
لەئێستادا وەزیری دەرەوەی ئێران و شاندی یاوەری، بۆ بەشداریکردن لە خولی دووەمی دانوستانەکان گەیشتووەتە رۆما و بڕیارە دانوستانەکە، جارێکیتر بە شێوازی ناڕاستەوخۆ بەڕێوەبچێت.
عەباس عەرەقچی دوێنێ هەینی رایگەیاند، “لەم دانوستانانەدا هەڵوێستەکانمان روون و ئاشكران، قسەکانمان نەگۆڕاون و ناگۆڕدرێن. چاوەڕوانیش دەکەین لایەنەکانی دیکە بە جددیەتیی بیروڕا و پتەویی هەڵوێستەوە بەشداری دانوستانەکان بکەن”.
رۆژی 12/4/2025، دانوستانەکانی نێوان ئەمریکا و ئێران، لە مەسقەتی پایتەختی عومان دەستیپێکرد و باس لە چەند پرسێکی نێوانیان، بەتایبەت بابەتی بەرنامە ئەتۆمییەکەی ئێران و بەهێزکردنی پەیوەندییە سیاسی و ئابورییەکانی نێوان هەردوولا کرا و هەردوولاش گفتوگۆکانیان بە “بنیاتنەر” وەسفکرد.
