بافڵ جەلال تاڵەبانی، سەرۆکی یەکێتیی نیشتمانیی کوردستان و محەمەد شیاع سودانی، سەرۆک وەزیرانی عێراق لە سلێمانی کۆبوونەوە.
بەپێی راگەیەندراوێکی نوسینگەی راگەیاندنی سەرۆکی ئەنجومەنی وەزیرانی عێراق کە وێنەیەکی دەست تۆڕی میدیایی ئیستا کەوتووە و تێیدا هاتووە، لە کۆبوونەوەکەدا، بارودۆخی گشتیی وڵات و گرنگیی پاڵپشتیکردنی هێزە نیشتمانییەکان لە هەوڵەکانی حکومەت تاوتوێکرا، بۆ جێبەجێکردنی بەرنامەکەی و بەردەوامبوون لە بەدیهێنانی گەشەپێدانی گشتگیر، بەشێوەیەک خواستەکانی هاوڵاتییان لە سەرتاسەری وڵاتدا بەدیبهێنێت.
ئەوەش هاتووە، لە بەشێکی تری دیدارەکەدا، جەختکرایەوە لەسەر گرنگیی هەماهەنگی و هاوکاریی هاوبەش لە نێوان هەموو لایەنە سیاسییەکان، لە چوارچێوەی دەستوور و یاسادا، بۆ رووبەڕووبوونەوەی ئاستەنگەکان و چەسپاندنی ئاسایش و سەقامگیری، هەروەها هەوڵەکانی حکومەت دووپاتکرایەوە بۆ پاڵپشتیکردنی گفتوگۆکان لە هەرێمی کوردستانی عێراق بەمەبەستی پێکهێنانی حکومەتی نوێ.
ئەمڕۆ چوارشەممە، محەمەد شیاع سودانی و چەندین کەسایەتی و بەرپرسی باڵای عێراق و هەرێمی کوردستان، بەمەبەستی بەشداریکردن لە دیداری سلێمانی، سەردانی شاری سلێمانییان کرد.
