دۆناڵد ترەمپ، سەرۆکی ئەمریکا رایدەگەیەنێت، کۆبوونەوەیەکی لەگەڵ راوێژکارەکانی بۆ تاوتوێکردنی پرسی ئێران ئەنجامداوە و دەشڵێت، بەمزووانە “بڕیارێکی خێرا” لەبارەی ئێرانەوە دەدات.
ماڵپەڕی ئاکسیۆس، بە پشتبەستن بە دوو سەرچاوەی ئاگادار لە راپۆرتێکدا بڵاویکردەوە، رۆژی شەممەی داهاتوو، لە رۆمای پایتەختی ئیتاڵیا، خولی دووەمی دانوستانە ئەتۆمییەکانی نێوان واشنتن و تاران بەڕێوەدەچێت.
ترەمپ کە پێشتر هەڕەشەی وەڵامدانەوەی سەربازیی کردبوو، ئەگەر دانوستانەکان لەسەر بەرنامەی ئەتۆمیی ئێران شکستبهێنن، لە لێدوانێکدا بە رۆژنامەنووسانی راگەیاند، پێشهاتەکانی مەلەفی ئێرانی لەگەڵ راوێژکارەکانی تاوتوێکردووە و وتیشی، “زۆر بە خێرایی بڕیار لەسەر ئێران دەدەین”.
رۆژی شەممە 12/4/2025، دانوستانەکانی نێوان ئەمریکا و ئێران، لە مەسقەتی پایتەختی عومان دەستیپێکرد و باس لە چەند پرسێکی نێوانیان، بەتایبەت بابەتی بەرنامە ئەتۆمییەکەی ئێران و بەهێزکردنی پەیوەندییە سیاسی و ئابورییەکانی نێوان هەردوولا کرا.
هەردوولا گفتوگۆکانیان بە “بنیاتنەر” وەسفکرد و پشتڕاستیانکردەوە، کە بڕیارە هەفتەی داهاتوو خولی دووەمی دانوستانەکان بەڕێوەبچێت.
