بافڵ جەلال تاڵەبانی، سەرۆكی یەكێتیی نیشتمانیی كوردستان لە بەغداد لەگەڵ د. لەتیف جەمال رەشید، سەرۆك كۆماری عێراق كۆبووەوە.
لە كۆبوونەوەكەدا دۆسیە سیاسی و ئەمنی و ئابورییەكان لەسەر ئاستی وڵات و ناوچەكە هەڵسەنگاندنی بۆ كرا و پابەندبوون بە دیدی هاوبەش و رێككەوتن لەسەر پڕۆژەی نیشتمانی لەپێناو زاڵبوون بەسەر ئاڵنگارییەكاندا جەختی لەسەر كرایەوە.
بەڕێوەچوونی هەڵبژاردنی ئەنجومەنی نوێنەرانی عێراق لە كۆبوونەوەكەدا خرایەبەر باس و هەردوولا پەرۆشبوون بۆ رەخساندنی زەمینەی لەبار بۆ ئەنجامدانی هەڵبژاردنێكی پاك و بێگەرد كە ببێتە مایەی بووژاندنەوە و بەهێزتركردنی هاوبەشیەتی و زیاتر خزمەتكردنی خەڵك.
سەرۆك بافڵ جەلال تاڵەبانی لە كۆبوونەوەكەدا جەختی لە كاركردن بە بنەما دەستووریی و یاساییەكان كردەوە و رایگەیاند، “یەكێتی سیاسەتی هاوسەنگی و پاراستنی ئارامی و ئاسایش پەیڕەودەكات كە ئەمەش بۆ زامنكردنی مافی هەموولایەكە”.
سەرۆكی یەكێتیی نیشتمانیی كوردستان سوپاسی سەرۆك كۆماری عێراقی كرد بۆ پەرۆشی و بەدواداچوونی بەردەوامی بۆ كێشەكانی نێوان هەولێر و بەغداد بە تایبەتی پرسی مووچە و شایستە داراییەكانی مووچەخۆرانی هەرێمی كوردستان.
