وتەبێژی کۆمسیۆنی باڵای سەربەخۆی هەڵبژاردنەکانی عێراق رایگەیاند، کار لەسەر ئامادەکردنی ئامێرەکانی هەڵبژاردن دەکەن، بۆ دڵنیابوون لە بەڕێوەبردنی پرۆسەی هەڵبژاردن بەبێ گرفت.
جومانە غەلای، وتەبێژی کۆمسیۆنی عێراق رایگەیاند، بەپێی دەستوور و یاسا، کۆمسیۆن پابەنددەبێت بە ئەنجامدانی هەڵبژاردنەکان لەوادەی دیاریکراوی خۆیدا.
وتیشی، ژمارەی ئەو کەسانەی لەدایکبووی ساڵی 2007ـن و بە دەنگدەری نوێ هەژماردەکرێن، زیاترە لە یەک ملیۆن دەنگدەر”.
ئاماژەی بەوەشکرد، کۆمسیۆن لە رێگەی هەزار و 79 ناوەندی تۆمارکردن لە سەرتاسەری عێراق، پێشوازی لە دەنگدەران دەکات، ئەمە جگە لە ناردنی تیمی گەڕۆک بۆ دامودەزگا و دەستە حکومییەکان، بەمەبەستی هۆشیارکردنەوەی خەڵک و پەروەردەکردنیان لە گرنگیی نوێکردنەوەی تۆماری هەڵبژاردنەکان.
جومانە غەلای ئەوەشی وت، “کۆمسیۆن لەئێستادا کار لەسەر نۆژەنکردنەوە، ئامادەکردن و پاراستنی ئامێرەکانی هەڵبژاردن دەکات بۆ دڵنیابوون لە بەڕێوەبردنی پرۆسەی هەڵبژاردن بەبێ گرفت”.
