وەزیری کشتوکاڵ و سەرچاوە ئاوییەکانی هەرێم رایگەیاند، “هەموومان بەرامبەر پارێزگاریکردن لە سامانی نیشتمانیی ئاو بەرپرسیارین”.
بێگەرد تاڵەبانی، وەزیری کشتوکاڵ و سەرچاوە ئاوییەکانی هەرێم رایگەیاند، “ئەمڕۆ رۆژی جیهانیی ئاوە دەتوانین بڵێین رۆژی جیهانیی ئەڵماسە شینە سروشتییەکەی ژیانی مرۆڤایەتییە، ئەم بۆنە گرنگە جیهانییە دەرفەتێکی باشە کە هەڵوەستە بکەین لە سەر گرنگی و پێویستیی پاراستنی ئاوی سازگار ، بەتایبەت بەهۆی خێرابوونی گۆرانکارییەکانی کەشوهەوا و تێکچوونی نەخشەی پێشبینییەکان و کەمبوونەوەی رێژەی بارانبارین و کاریگەریەکانی لەسەر ئاسایشی خۆراک و ئاو لە جیهان بەگشتی و عێراق و هەرێمی کوردستان بە تایبەتی”.
باسی لەوەشکرد، “لەم رۆژەدا جەخت دەکەینەوە کە ئاو سامانێکی نیشتمانیی قەربوو نەکراوەیە و بەردەوامبوونی ژیان بەبێ سەرچاوەی ئاوی سازگار مەحاڵە، بۆیە ئەرک و بەرپرسیاریەتیی هاوبەش دەکەوێتە ئەستۆمان، بۆ ئەم مەبەستە ئێمە لەسەر ئاستی وەزارەتی کشتوکاڵ و سەرچاوەکانی ئاو لە هەرێمی کوردستان، لەڕوانگەی باوەربوونمان بە گرنگیی ئاو وە درککردنمان بە مەترسی و ئالەنگەرییەکانی وشکەساڵی و گۆڕانی کەشوهەوا، لەماوەی رابردوو تاوەکو ئێستاش پلان و بەرنامە و رێکاری گونجاومان هەبووە، بە ئەوپەڕی پەرۆشییەوە کارمانکردووە لە پێناوی خێراکردنی رێکارەکانی چۆنیەتی گلدانەوەی ئاو لەسەر سەرچاوە و رێڕەوە ئاوییەکان، بە دروستکردنی دەیان بەنداو و پۆند و پرۆژەی ئاودێری و ریسایکلکردنی ئاوی قورس و ئەنجامدانی هەڵمەتی رواندنی نەمام و بایەخدان بە پرۆژەکانی باخداری و زیادکردنی پانتایی سەوزایی و بەرهەمهێنانی نەمام و تەرزی نوێ و بنەتۆوی گونجاوی کشتوکاڵی کە بەرگەی گۆڕانکاری و پلەی بەرزی گەرمی بگرێت”.
بێگەرد تاڵەبانی ئاماژەی بەوەشکرد، “دەبێت ئەو راستییە بزانین کە ئێمە هەموومان لە هەرێمی کوردستان بەرپرسیارین بۆ پارێزگاری و دەستگرتن بە سامانی نیشتمانیی ئاو، بەتایبەت هۆشیاریی نیشتمانی لە بەکارهێنانی ئاو لەلایەن هاوڵاتییان و دامەزراوەکانی کەرتی گشتی و تایبەت، وە لە هەمووی گرنگتر دروستبوونی روئیایەکی گشتی لەسەر ئاستی حکومەت بۆ دابینکردنی بودجەیەکی تایبەت لەسەر ئاستی هەرێمی کوردستان، بۆ تەواوکردنی پلان و بەرنامەکانمان بەئامانجی باشترکردنی دۆخی ئاسایشی ئاو و خۆراک لە هەرێمەکەمان”.
