کۆنفرانسی ئاسایشی میونشن یەکێکە لە گرنگترین کۆڕە جیهانییەکان بۆ گفتوگۆکردن لەسەر پرسە ئەمنی و ستراتیژییەکان، کە تێیدا سەرکردەکانی وڵاتان و بڕیاردەران کۆدەبنەوە بۆ گفتوگۆکردن لەسەر ئەو ئاستەنگە ئەمنییانەی رووبەڕووی جیهان دەبنەوە.
بەشداریکردنی بافڵ جەلال تاڵەبانی، سەرۆکی یەکێتیی نیشتمانیی کوردستان، لەم کۆنفرانسەدا تەنها ئامادەبوونێکی پرۆتۆکۆلی نییە، بەڵکو رەنگدانەوەی ئەو رۆڵە سەرەکییەیە کە یەکێتی لە هاوسەنگییە ئەمنی و سیاسییەکانی ناوچەکەدا دەیگێڕێت.
رۆڵی بەرچاوی یەکێتیی نیشتمانیی کوردستان لە بۆشاییەوە نەهاتووە، بەڵکو ئەنجامی چەندین فاکتەرە، گرنگترینیان:
1. بەشداریکردنی کارای لە شەڕی دژە تیرۆردا : یەکێتیی نیشتمانی ڕۆڵێکی سەرەکی گێڕاوە لە بەرەنگاربوونەوەی رێکخراوە تیرۆریستییەکان، چ لە شەڕەکانی دژی داعش یان لەڕێگەی هەوڵە هەواڵگری و ئەمنییەکانەوە کە بەشداربوون لە سەقامگیرکردنی چەندین ناوچە.
2. پەیوەندییە هەرێمی و نێودەوڵەتییە هاوسەنگەکان: یەکێتیی نیشتمانیی کوردستان خاوەنی تۆڕێکی پەیوەندیی بەرفراوانە لەگەڵ هێزە جیاوازە کاراکانی ناوچەکە، چ نێودەوڵەتی بن یان هەرێمی.
سەرەڕای جیاوازیی بەرژەوەندیی ئەم هێزانە، حیزبەکە توانیویەتی پەیوەندیی هاوسەنگ لەگەڵیان بپارێزێت، کە وایکردووە ببێتە لایەنێکی سەرەکی لە هەر هاوکێشەیەکی ئەمنی پەیوەست بە عێراق و کوردستان و ناوچەکە بە گشتی.
3. رۆڵی ی.ن.ک لە هاوکێشەی سیاسیی عێراقدا: لە ناو عێراقدا، یەکێتیی نیشتمانی بە هێزێکی سیاسیی خاوەن قورسایی دادەنرێت، کە بەشداری لە پاراستنی سەقامگیری سیاسی و ئەمنی دەکات، بەتایبەتی لە سایەی ئەو گۆڕانکارییە خێرایانەی کە وڵات بەخۆیەوە دەیبینێت.
ئامادەبوونی سەرۆک بافڵ تاڵەبانی لە کۆنفرانسی میونشن گرنگییەکی تایبەتی هەیە لە سایەی بارودۆخی ئەمنی و سیاسیی ئێستادا.
کۆنفرانسەکە لە کاتێکدا دەبەسترێت کە ناوچەکە رووبەڕووی ئاستەنگیی گەورە دەبێتەوە، لە هەڕەشە ئەمنییەکانەوە، بە تێپەڕین بە گۆڕانکارییە جیۆپۆلەتیکییەکان، تا دەگاتە کێبڕکێی نێودەوڵەتی لەسەر دەسەڵات.
ئامادەبوونی سەرکردایەتیی یەکێتیی نیشتمانی لەم کۆڕە جیهانییەدا رەنگدانەوەی:
• دانپێدانانێکی نێودەوڵەتییە بە گرنگی رۆڵی کورد لە سەقامگیریی ناوچەکەدا.
• پشتگیرییە بۆ هەڵوێستی یەکێتیی نیشتمانی وەک یاریکەرێکی سەرەکی لە هاوسەنگییە هەرێمییەکاندا.
- بەهێزکردنی پەیوەندییە سیاسییەکانە لەگەڵ هێزە نێودەوڵەتییە کاریگەرەکان، بە شێوەیەک کە خزمەتی بەرژەوەندییەکانی کوردستان و عێراق بە گشتی دەکات.
لەڕێگەی بەشداریکردنی سەرۆک بافڵ جەلال تاڵەبانی لە کۆنفرانسی میونشن، دەکرێت چەند پەیامێکی سیاسی دەربهێنرێت:1. جەختکردنەوە لەسەر رۆڵی یەکێتیی نیشتمانی وەک هاوبەشێکی ئەمنیی متمانەپێکراو لە ناوچەکە، نەک تەنها یاریکەرێکی ناوخۆیی سنووردار.2. پیشاندانی توانای یەکێتی لە دروستکردنی پەیوەندیی هاوسەنگ لەگەڵ هێزە جیاوازەکان، تەنانەت لە سایەی ناکۆکییە هەرێمییە توندەکاندا.
3. بەهێزکردنی پێگەی یەکێتیی نیشتمانیی کوردستان وەک لایەنێکی سەرەکی لە داڕشتنی سیاسەتە ئەمنی و هەرێمییەکان.
ئامادەبوونی یەکێتیی نیشتمانیی کوردستان، بە نوێنەرایەتیی سەرۆک بافڵ جەلال تاڵەبانی، لە کۆنفڕانسی ئەمنی میونشن پشتڕاستی دەکاتەوە کە حیزبەکە هێشتا یاریکەرێکی سەرەکییە لە شانۆی هەرێمیدا.
بەهۆی ستراتیژیەتە هاوسەنگەکەی و پەیوەندییە بەهێزەکانییەوە، توانیویەتی خۆی وەک هاوبەشێکی سەرەکی لە رووبەڕووبوونەوەی ئاستەنگە ئەمنییەکان بسەلمێنێت، کە پێگەی لە گۆڕەپانی نێودەوڵەتیدا بەهێزدەکات و رۆڵێکی کاریگەرتری لە داهاتووی ناوچەکەدا بۆ دەستەبەردەکات.
