سۆران عومەر ئەندامی ئەنجومەنی نوێنەرانی عێراق رایگەیاند، داوای لە وەزارەتی دارایی عێراق کردووە، کاتێک لیستی مووچەی فەرمانبەرانی هەرێم کێشەی تێدانەما لیستەکان رەوانەی بانکەکانی رەشید و رافیدەین بکات بۆ تەوتین.
سۆران عومەر رایگەیاند، “داوام لە وەزارەتی دارایی عێراق کردووە کاتێک لیستی مووچەی فەرمانبەرانی هەرێم لەساڵی 2025 کێشەی تێدانامێنێت لیستەکان رەوانەی بانکەکانی رەشید و رافیدەین بکات بۆ تەوتین، وەزارەتی داراییش 20ی 1 ی 2025 بە نووسراوی ژمارە 268 وەڵامی هەردوو بانکی رەشید و رافیدەینی هاوپێچ کردووە.
ئاماژەی بەوەشکردووە، بانکی رەشید بە نووسراوی ژمارە (273 لە19ی 1 ی 2025) دەڵێت، ئامادەیی تەواومان هەیە بۆ تەوتینی مووچەی فەرمانبەرانی هەرێم و چاوەڕێین گرێبەستی نێوان بانکەکەمان و فەرمانگەکانی پەیوەندیدار بکرێت، کاتێک شەش زانیاری فەرمانبەرمان پێبگات لە رێگای ئاپێکی تایبەت بە بانکەوە لەمۆبایلەوە کارتی بانکی تەوتین کارادەکرێت، بۆ دابەشکردنیش دەتوانرێت لە رێگای لقی بانکە ئەهلییەکان و دەروازەکانەوە مووچەکە وەربگرن.
ئاشکراشیکردووە، بانکی رافیدەین لە نووسراوێکدا جەختدەکاتەوە ئامادەن بۆ تەوتینی مووچەی فەرمانبەرانی هەرێم و دەرکردنی ماستەرکارتی جیهانی و کارتی ناوخۆیی و وەرگرتنی مووچە لەرێی بانکە ئەهلییە رێپێدراوەکان.
