پێشەوا هەورامانی، وتەبێژی حكومەتی هەرێمی كوردستان رایگەیاند، “دوای چەندین كۆبوونەوە و هەوڵ و ماندووبوون بۆ ئەوەی یاسای بودجەی گشتیی عێراق لەلایەن ئەنجومەنی نوێنەرانەوە هەمواربكرێتەوە و هەناردەكردنی نەوتی هەرێم دەستپێبكاتەوە، هەرچەندە خوێندنەوەی یەكەم و دووەمیشی بۆ كرا، بەڵام بەداخەوە لە كۆتا ساتەكاندا، دەنگی لەسەر نەدرا”.
باسیلەوەش كردووە،”ئێمە تووشی سەرسووڕمان بووین بەوەی پێشنیازێك لە لایەن نوێنەری حكومەتی عێراقەوە لە ئەنجومەنی نوێنەرانەوە، تاكلایەنە کراوە”.
وتەبێژی حكومەتی هەرێم ئەوەشیخستەڕوو، “ئەم هەوڵانە زیان بە هەموو عێراق دەگەیەنن و كێشەكان قووڵتردەكەنەوە و خزمەت بە چارەسەركردنی پرسەكان ناكات، بۆیە ئێمە ئەو هەوڵ و پێشنیازانە، بە هەموو شێوەیەك رەتدەكەینەوە و دژی دەوەستین و دەبێت ئەو پێشنیازەی لەسەر رێككەوتووین، بخرێتە دەنگدانەوە”.
