دەزگای لوتکە رایگەیاند، “ساڵی رابردوو ژمارەی پەنابەرانی تۆمارکراو بۆ نزمترین ئاست لە ماوەی 40 ساڵدا دابەزی”.
دەزگای لوتکە بۆ کاروباری ئاوارە و پەنابەران رایگەیاند، “دەسەڵاتدارانی سوید سیاسەتێکی توندیان بۆ مامەڵەکردن لەگەڵ دۆسیەی کۆچبەران گرتەبەر، بەپێی ئامارەکان، ئەو وڵاتە لە ساڵی رابردوودا تەنها شەش هەزار و 250 پەنابەری تۆمارکردووە، کە ئەمەش کەمترین ژمارەیە لە ماوەی 40 ساڵی رابردوودا لە وڵاتەکەدا تۆمارکراوە”.
بە پێی بەدواداچوونەکانی دەزگای لوتکە، “ژمارەی ئەو کەسانەی لە سوید داوای مافی پەنابەرییان کردووە لە ساڵی 2024دا نۆ هەزار و 645 پەنابەر بوون، کە کەمترین ژمارەیە لە ساڵی 1996ەوە تۆمارکراوە و بە بەراورد بە ساڵی 2022 بەڕێژەی 42% کەمیکردووە”.
دەزگای لوتکە دەڵێت، ئەو ژمارەیە پەنابەرانی ئۆکراینی ناگرێتەوە، کە بە شێوەیەکی ئۆتۆماتیکی لە سەرانسەری یەکێتیی ئەوروپا پارێزگارییەکی کاتییان پێدەدرێت.
باس لەوەش دەکات، “لە ساڵی 2015 و لە لوتکەی قەیرانی کۆچبەراندا سوید نزیکەی 163 هەزار پەناخوازی تۆمارکرد کە زۆرترین ژمارەیە بە بەراورد بە ژمارەی هاوڵاتییان لە یەکێتیی ئەوروپا.
دەزگای لوتکە ئەوەش دەخاتەڕوو، “هەرچەندە سوید سەردەمانێک بە پەناگەیەک دادەنرا بۆ ئەو کەسانەی کە بەهۆی شەڕ و گۆشەگیرییەوە کاریگەرییان لەسەر بووە، بەڵام وردە وردە سیاسەتی خۆی گۆڕیوە، دوای ئەوەی رووبەڕووی کێشە بووەتەوە لە یەکخستنی زۆرێک لە کەسانی تازەرۆیشتوو بۆ وڵاتەکە”.
